ත්රිකුණාමලය දිස්ත්රික් මහ රෝහලේ දරු ප්රසූතියකදී බිලිඳෙකු මියයෑමේ සිද්ධිය සහ රජයේ වෛද්ය නිලධාරීන්ගේ සංගමය (GMOA) ක්රියාත්මක කළ වෘත්තීය සමිති ක්රියාමාර්ගය අතර කිසිදු සම්බන්ධයක් නොමැති බව එම සංගමය අවධාරණය කරයි. අද (11) කොළඹදී පැවති ප්රවෘත්ති සාකච්ඡාවකදී සංගමයේ උප සභාපති, විශේෂඥ වෛද්ය චන්දික එපිටකඩුව මහතා මේ බව සඳහන් කළේය.
වෘත්තීය සමිති ක්රියාමාර්ගවලදී වෛද්යවරුන් කිසිදු විටක හදිසි ප්රතිකාර සේවාවලින් ඉවත් නොවන බවත්, ප්රසූතිකාගාර සේවාවන් හදිසි ප්රතිකාර ගණයට අයත් වන බවත් ඔහු පෙන්වා දුන්නේය. මෙම සිදුවීම මුල් කරගනිමින් යම් පිරිසක් සිතාමතාම සිය සංගමයට චෝදනා එල්ල කිරීමට උත්සාහ කරන බව ද ඔහු වැඩිදුරටත් පැවසීය.
අදාළ වෛද්යවරුන් දෙදෙනාගේ වැඩ තහනම් කිරීම පිළිබඳව මෙතෙක් නිල වශයෙන් ලිඛිතව දැනුම් දී නොමැති බව පවසන වෛද්ය එපිටකඩුව මහතා, ඔවුන් පෞද්ගලික සේවයේ නිරත වී ඇත්තේ සිය සේවා කාලයෙන් පසුව බව ද සඳහන් කළේය. පසුගිය අප්රේල් 09 වනදා සිදුවූ මෙම මරණය සම්බන්ධයෙන් රාජකාරි පැහැර හැරීමේ චෝදනාව මත විශේෂඥ වෛද්යවරයෙකුගේ සහ නේවාසික වෛද්යවරියකගේ වැඩ තහනම් කිරීමට සෞඛ්ය අමාත්යාංශය පියවර ගෙන තිබුණි.
