සෞදි අරාබියේ සේවය කරන ශ්රී ලාංකික විදේශගත ශ්රමිකයන් 100 කට ආසන්න පිරිසක් විසින් පසුගිය ජනවාරි මාසයේදී ස්වකීය නිවෙස් වෙත එවන ලද ආහාර ද්රව්ය, ඇඳුම් පැළඳුම් සහ ගෘහ භාණ්ඩ ඇතුළත් කාගෝ බහලුම් මෙරටට ලැබී තිබියදීත්, ඒවා ලබාදීමට නම් නැවත වතාවක් මුදල් ගෙවන ලෙස ලංකාවේ නියෝජිත ආයතනය තර්ජනය කිරීම හේතුවෙන් අදාළ ශ්රමිකයන් සහ ඔවුන්ගේ පවුල්වල සාමාජිකයන් දැඩි අසහනයට පත්ව තිබේ.
අදාළ භාණ්ඩ නිවසටම ප්රවාහනය කර භාරදීමේ (Door to door delivery) සම්පූර්ණ පිරිවැය සෞදියේදී අදාළ කාගෝ සමාගම වෙත ගෙවා තිබුණද, ලංකාවේ බෙදාහැරීමේ ආයතනය වෙත මුදල් ලැබී නොමැති බව පවසමින් මෙලෙස නීති විරෝධී ලෙස නැවත මුදල් අය කිරීමට උත්සාහ කරන බව විදේශගත ශ්රමිකයෝ චෝදනා කරති. මැදපෙරදිග පවතින ප්රවාහන බාධා හමුවේ මාස 8 කට ආසන්න කාලයක් ප්රමාද වී පැමිණි මෙම භාණ්ඩ නිදහස් කරගැනීමට නොහැකිව අසරණ වී සිටින පිරිස වෙනුවෙන් විදේශ සේවා නියුක්ති කාර්යාංශය ඇතුළු වගකිවයුතු බලධාරීන් වහාම මැදිහත් විය යුතු බවට ඉල්ලීම් ඉදිරිපත් වේ.
