විවිධ හේතු මත දීර්ඝ කාලයක් අතහැර දමා තිබූ ජාතික සම්පතක් වන වාලච්චේන කඩදාසි කම්හලේ ෆයිල් කවරයක් මාර්තුවේදී ජනතාව අතට පත් කරන තැනට එහි කටයුතු ප්රතිසංස්කරණය කිරීමට තම අමාත්යාංශයට හැකිව ඇති බව කර්මාන්ත හා සැපයුම් කළමනාකරණ අමාත්ය විමල් වීරවංශ මහතා පවසයි.
අමාත්යවරයා අද(10) කොල්ලුපිටියේ පිහිටි සිය අමාත්යාංශයේදි මාධ්ය හමුවක් කැඳවමින් කියා සිටියේ ඒ සඳහා ඉඩකඩ නිර්මාණය කළ ජනාධිපති ගෝඨාභය රාජපක්ෂ මහතා, ආරක්ෂක ලේකම් ඇතුළු යුද, නාවික හමුදා ප්රධානීන් හා ඒවායේ ඉංජිනේරු බලකා නිලධාරීන්ගේ සහාය මතයි.
එහිදී වැඩිදුරටත් අදහස් දැක්වූ වීරවංශ මහතා මෙසේද කියා සිටියේය “ කර්මාන්ත අමාත්යාංශය යටතේ ඇති විවිධ වකවානුවල වසා දමන ලද, අතහැර දමන ලද කර්මාන්ත ශාලා රැසක්, යළි ආරම්භ කිරීම සඳහා අපි මේ දිනවල අපේ පූර්ණ අවධානය යොමු කර තිබෙනවා. ඒ අනුව අපට ගෙවී ගිය සතියේ හැකි වුණා, වසා දමා තිබූ ලංකා පිඟන් සංස්ථාවට අයත් ඔඞ්ඩුසුඩාන් උළු කර්මාන්තශාලාව යළි ඇරඹීමට කැබිනට් අනුමැතිය ලබා ගැනීමට. රජරට සැම්සන් ටයිල් සමාගම සමඟ මෙහිදී හවුල් ව්යාපාරික සැලසුමකට යනු ලබනවා. ලංකා පිඟන් සංස්ථාව සතු කිසිවක් පෞද්ගලිීකරණය නොකොට පාර්ශව දෙක එකට එකතුවී එම කර්මාන්ත ශාලාව සංවර්ධනය කිරීමයි මෙහිදී සිදුවන්නේ. එහිදී ඔඞ්ඩුසුඩාන් ප්රදේශයේ තරුණ තරුණියන්ගේ රැකියා ප්රශ්නයටත් විසඳුමක් ලැබේවි. යුද්ධයේ බලපෑම තීව්රව තිබූ ප්රදේශයක් වන ඔඞ්ඩුසුඩාන්වල පිහිටි උළු කර්මාන්ත ශාලාව අපි පසුගිය දිනවල සමීපව නිරීක්ෂණය කරනු ලැබුවා. යුද සමයට පෙර එහි සේවයේ යෙදී සිටි පිරිස් ඉල්ලා සිටි ආකාරයටම ඔවුන්ගේ දරුවන්ට රැකියා අවස්ථා ලැබේවි. එම ප්රදේශයම පිබිදීමකට ලක්වේවි. ලංකා පිඟන් සංස්ථාව සතු උළු කර්මාන්ත ශාලා 09ක් රට පුරා පවතිනවා. නමුත් 01ක් පමණයි විවෘතව ඇත්තේ. ඔඞ්ඩුසුඩාන් හා මහියංගනය පිහිටි කර්මාන්තශාලා 02 මාර්තුවේදී යළි විවෘත කෙරෙනවා. එසේම ඉතිරි කර්මාන්ත ශාලා 06 මේ වසර අවසන් වීමට පෙර අප විවෘත කරනවා. අපේ රටෙන් උළු සඳහා වාර්ෂිකව පිටරටට ඇදී යන මුදල රුපියල් මිලියන 4000ක්. ඒ මුදල රට තුළ ඉතිරි කර ගැනීමට කර්මාන්ත අමාත්යාංශය ලෙස අප පියවර ගන්නවා.යැයි අමාත්ය වීරවංශ මහතා පවසා සිටියේය.
දිලිනි සමන්මලි
