මහ කන්නයේ වී වගා කරන ගොවි ජනතාවට පොහොර සහනාධාරය වශයෙන් රජය විසින් ලබා දෙන ලද රුපියල් බිලියන 11ක මුදලක් පසුගිය 27 වනදා දිනය වනවිට බෙදා අවසන් බව ගොවිජන සංවර්ධන කොමසාරිස් ජනරාල් ඒ. එම්. එච්. එල්. අබේරත්න මහතා පවසයි.
ඒ මහතා මේ බව පැවසුවේ පසුගිය 27 වනදා කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතාගේ ප්රධානත්වයෙන් කෘෂිකර්ම පර්යේෂණ හා නිෂ්පාදන සහකාරවරුන් සමග ගොවිජන සංවර්ධන දෙපාර්තමේන්තුවේ දී පැවැති සාකච්ඡාවකදිය.
2023/24 මහ කන්නයේ දී වී වගාකරන ගොවීන් සඳහා හෙක්ටයාර් එකකට රුපියල් 15,000ක් බැගින් මුදලක් ගොවි ගිණුම්වලටම මුදා හැරීමට කෘෂිකර්ම හා වැවිලි කර්මාන්ත අමාත්යාංශය තීරණය කරනු ලැබීය.
මේ සඳහා රජය විසින් රුපියල් බිලියන 11.6 මුදලක් වෙන් කරනු ලැබීය.
එම සමස්ත මුදලින් ඊයේ දිනය වනවිට රුපියල් බිලියන 11ක් ගොවි ගිණුම්වලට බැර කිරීමට පියවර ගත් අතර තවත් ලබා දීමට ඉතිරිව ඇත්තේ දශම 06ක පමණ මුදලකි. නුවරඑළිය හා බදුල්ල දිස්ත්රික්කවල ගොවීන් වී වගාව ආරම්භ කරනු ලබන්නේ අනෙකුත් ප්රදේශවලට වඩා පසුවය.
එමනිසා දැනට මුදල් ගෙවීමට ඉතිරිව ඇත්තේ එම දිස්ත්රික්ක දෙකේ පමණක් බවත්, මීට අමතරව අනෙකුත් ප්රදේශවල ගොවින් කිහිප දෙනෙකුට හෝ අදාල මුදල් ලැබී නොමැති නම් ඊට හේතුව ඔවුන් ලබා දුන් ගිණුම් අංක හෝ නම්වල ඇති දෝෂ සහිතභාවය විය හැකිබවත් කොමසාරිස් ජනරාල්වරයා පවසයි.
කෙසේ වුවද මේ වනවිට වී වගා කළ සමස්ත ගොවින්ගෙන් සියයට 98කටම අදාල මුදල් ඔවුන්ගේ ගිණුම්වලටම යොමු කර අවසන් කර ඇති බව ද කොමසාරිස් ජනරාල්වරයා සඳහන් කළේය.
මෙහිදී අදහස් පළ කළ කෘෂිකර්ම හා වැවිලි කර්මාන්ත අමාත්ය මහින්ද අමරවීර මහතා මෙවර මහ කන්නයේ වී අස්වනු ඉහළයාමට ගොවිජන සංවර්ධන දෙපාර්තමේන්තුවේ නිලධාරින් අනලස්ව කටයුතු කළ ආකාරය බලපාන ලද බවත්, රටේ සියලු දෙනාගේ කෘතඥතාවය ගොවිජන සංවර්ධන දෙපාර්තමේන්තුවට ලැබිය යුතු බවත් පැවසිය.
