එක්සත් ජාතික පක්ෂය ප්‍රමුඛව ජාතික ප්‍රජාතන්ත්‍රවාදී පෙරමුණ නමින් නව සන්ධානයක් ලබන මස 05 වන දා බිහි කරන බවත්,සන්ධානගත වන සියලු දේශපාලන පක්ෂවල අනන්‍යතාව ආරක්ෂා කර ගනිමින් බිහිකරන නව පෙරමුණ මගින් ඉදිරි වසර 5 තුළ දී රට ඉදිරියට ගෙන යන බව අග්‍රාමාත්‍ය රනිල් වික්‍රමසිංහ මහතා පවසයි.
අග්‍රාමාත්‍යවරයා මේ බව පැවසුවේ අවිස්සාවේල්ල පොදු වෙළෙඳ සංකීර්ණයට මුල්ගල තැබීමෙන් අනතුරුව ජන හමුවට එක්වෙමින්.
“අනාගතයට ගැලපෙන පරිදි අප වෙනස් නොවුණහොත්, අපටත් රටටත් අනාගතයක් නැති වෙනවා. මම දේශපාලනයට පැමිණි කාලයේ ප්‍රධාන පක්ෂ දෙකක් තිබුණා. මේ වන විට පක්ෂ ගණනාවක් රටේ ක්‍රියාකාරී දේශපාලනයේ යෙදෙනවා. මේ සියලූ දෙනාම එකට එකතුවී රට ඉදිරියට ගෙන යා යුතුයි. සියලූ දෙනා එකතු කරගෙන රට ඉදිරියට ගෙන යෑමේ විප්ලවීය පියවර ගැනීමට අප තීරණය කළා. රටේ අනාගතය වෙනුවෙන් පොදු ප්‍රතිපත්තියක් සකස් කිරීමට නව සන්ධානයක අවශ්‍යතාවය මතු වෙනවා. නව සන්ධානයක් සකස් කරමින් රට ඉදිරියට ගෙන යෑමට අවශ්‍ය පොදු ප්‍රතිපත්තිය සකස් කළ යුතුයි. දේශපාලන පක්ෂවල අනන්‍යතාව රැකෙන පරිදි අප විසින් ඇති කරන නව සන්ධානය දේශාපාලන පක්‍ෂයක් ලෙස ලියාපදිංචි කිරීමට අප තීරණය කළා. ජාතික ප්‍රජාතන්ත්‍රවාදී පෙරමුණ නමින් නව සන්ධානය අගෝස්තු මස 05 වනදා බිහි කිරීමට සූදානමින් සිටිනවා.
මෙම සන්ධානය හවුල්කාර පක්‍ෂවලට පමණක් සීමාවන්නේ නැහැ. අලූතින් හිතන රට සංවර්ධනය කිරීමට කැමැති සියලූ දෙනාටම නව සන්ධානයට එකතුවීමේ අවස්ථාව ලබාදී තිබෙනවා. සන්ධානය ලියාපදිංචි කිරීමෙන් නතර නොවී අනාගත පරපුර, අලූතින් ඇතිවූ මධ්‍යම පන්තිය හා ගොවි ජනතාව ඇතුළු සියලූ දෙනාටම ගැලපෙන පරිදි ප්‍රතිපත්ති සකස් කිරීම සිදු කරනවා.
ප්‍රතිපත්ති පදනම් කරගෙන බිහිකරන නව සන්ධානයෙන්, ඉදිරියේ දී පැවැත්වෙන ජනාධිපතිවරණයට හා පාර්ලිමේන්තු මැතිවරණයට ඉදිරිපත්වීමට බලාපොරොත්තු වෙනවා. කිසිඳු වැඩපිළිවෙළක් ප්‍රතිපත්තියක් නොමැතිව නව සන්ධානයේ ලකුණට ඡන්දය ලබාදෙන ලෙස ජනතාවගෙන් අපි ඉල්ලන්නේ නැහැ.
රටේ ජනතාවගේ අදහස් වෙනස්වී තිබෙනවා. ආණ්ඩුවෙන්, දේශපාලනඥයන් ගෙන්, විපක්‍ෂයෙන් අනාගත සැලසුම් පිළිබඳව ජනතාව ප්‍රශ්න කරනවා. අපි සියලූ දෙනාම එකතුවී ගොඩනඟන නව සන්ධානය ඇති කිරීමේ ප්‍රධාන අරමුණ ඉදිරි වසර 05 තුළ මේ රට සංවර්ධනය කර ඉදිරියට ගෙන ඒම බව සඳහන් කරන්න කැමැතියි. රට බේරාගෙන ස්ථාවරයක් ඇති කිරීමට අපට හැකිවුණා. දැන් පොදු ප්‍රතිපත්තියක් තුළින් රට ගොඩනැගීමට අලූත් දේශපාලන සන්ධානයක් බිහිකිරීමට අප පියවර ගන්නවා. සීඝ්‍රයෙන් වෙනස් වන ලෝකයත් සමඟ අපිත් ගැලපෙන පරිදි වෙනස් විය යුතුයි. එසේ නොවුණහොත් අපේ රටට හොඳ අනාගතයක් හිමිවන්නේ නැහැ. යැයි අග්‍රාමාත්‍යවරයා පැවසිය.
මෙම අවස්ථාවට මහා සංඝරත්නය ඇතුළු සර්ව ආගමික නායකයින් සහ මහානගර හා බස්නාහිර සංවර්ධන අමාත්‍ය පාඨලී චම්පික රණවක, එක්සත් ජාතික පක්ෂ අවිස්සාවේල්ල ප්‍රධාන සංවිධායක සහ හිටපු පළාත් සභා මන්ත්‍රී ලෙනාඩ් කරුණාරත්න යන මහත්වරු ප්‍රමුඛ දේශපාලනඥයින් ද රාජ්‍ය නිලධාරීන් ද ඇතුළු විශාල පිරිසක් එක්ව සිටියහ.
