දිවයින පුරා රාජ්ය විශ්වවිද්යාල පද්ධතිය තුළ පවතින දැඩි නේවාසික පහසුකම් අර්බුදයට ස්ථිරසාර විසඳුමක් ලබාදීමේ අරමුණින් නව රජය විසින් ක්රියාත්මක කරනු ලබන සමස්ත විශ්වවිද්යාල නේවාසිකාගාර 55ක් ඉදිකිරීමේ පුළුල් ජාතික ව්යාපෘතිය නිල වශයෙන් ආරම්භ කර තිබේ. ඒ අනුව මෙම ව්යාපෘතිය යටතේ ඉදිකෙරෙන ප්රථම නේවාසිකාගාරයේ ඉදිකිරීම් කටයුතු අධ්යාපන, උසස් අධ්යාපන හා වෘත්තිය අධ්යාපන අමාත්ය, අග්රාමාත්ය ආචාර්ය හරිනි අමරසූරිය මෙනවියගේ ප්රධානත්වයෙන් එළඹෙන අගෝස්තු 22 වන දින වවුනියාව විශ්වවිද්යාල පරිශ්රයේදී ආරම්භ කිරීමට නියමිතව ඇත.
විශ්වවිද්යාල ප්රවේශය ලබන දහස් සංඛ්යාත සිසුන් පිරිසක් වසර ගණනාවක් පුරා මුහුණපාමින් සිටින දැඩි ආර්ථික සහ නේවාසික දුෂ්කරතා මඟහරවාලීම සඳහා උසස් අධ්යාපන අමාත්යාංශය සහ රජය ගෙන ඇති මෙම ක්රියාමාර්ගය උසස් අධ්යාපන ක්ෂේත්රයේ යටිතල පහසුකම් සංවර්ධනය සම්බන්ධයෙන් සුවිශේෂී හැරවුම් ලක්ෂයක් වනු ඇතැයි අපේක්ෂා කෙේ. දුෂ්කර ප්රදේශවලින් පැමිණෙන සිසුන්ට අධ්යාපන කටයුතු පවත්වාගෙන යාම සඳහා ආරක්ෂිත සහ පහසුකම් සහිත පරිසරයක් නිර්මාණය කර දීම හරහා උසස් අධ්යාපනයේ ගුණාත්මකභාවය ඉහළ නැංවීමට මෙන්ම උපාධිධාරීන්ගේ ප්රතිඵලදායීතාව වර්ධනය කිරීමට මෙම ව්යාපෘතිය සෘජුවම බලපානු ඇත.
මෙම මහා පරිමාණ සංවර්ධන ව්යාපෘතිය සාර්ථකව ක්රියාත්මක කිරීමත් සමඟ දිවයින පුරා පිහිටි සෙසු විශ්වවිද්යාල වෙතද නේවාසික පහසුකම් පුළුල් කිරීමේ ඉදිරි අදියරයන් ක්රියාත්මක වන අතර, එමඟින් මෙරට උසස් අධ්යාපන ක්ෂේත්රයේ පවතින දීර්ඝකාලීන ගැටලු ක්රමානුකූලව විසඳෙනු ඇත. රජයේ ප්රතිපත්තිමය සැලසුම්වලට අනුව නියමිත කාලසීමාවන් තුළ මෙම ව්යාපෘති නිම කරමින් විශ්වවිද්යාල සිසුන්ගේ සුභසාධනය වෙනුවෙන් රජය දක්වන ප්රතිචාරය මෙරට අධ්යාපන අනාගතය සුරක්ෂිත කිරීම සඳහා ගත් තීරණාත්මක පියවරක් ලෙස විද්වතුන්ගේ පැසසුමට ලක්ව තිබේ.
