මීගමුව බන්ධනාගාරයේ ඇති වූ ගැටුම්කාරී තත්ත්වය සහ මරණ සිදුවීම සම්බන්ධයෙන් අපරාධ පරීක්ෂණ දෙපාර්තමේන්තුව විසින් නම් කරන ලද සැකකරුවන් 38 දෙනෙකු අද (අගෝස්තු 07) මීගමුව ප්රධාන මහෙස්ත්රාත් ශිලනි පෙරේරා මහත්මිය හමුවට ඉදිරිපත් කරන ලදී.
මීගමුව මහෙස්ත්රාත් අධිකරණයේදී මෙම නඩුව කැඳවූ අවස්ථාවේදී, අපරාධ පරීක්ෂණ දෙපාර්තමේන්තුව විසින් තවත් සැකකරුවන් 24 දෙනෙකු නම් කිරීමට කළ ඉල්ලීමට අධිකරණය අවසර ලබා දී තිබේ. ඒ අනුව මෙම නඩුවට අදාළව නම් කරන ලද මුළු සැකකරුවන් සංඛ්යාව 62 දක්වා ඉහළ ගොස් ඇත.
හඳුනාගැනීමේ පෙරට්ටුව සඳහා අද දිනයේ අධිකරණයට ඉදිරිපත් කළ යුතු සාක්ෂිකරුවන් වන නිලධාරීන් බන්ධනාගාර ගැටුමෙන් තුවාල ලබා තවමත් රෝහල්ගතව ප්රතිකාර ලබන බැවින්, අද (07) පැවැත්වීමට නියමිතව තිබූ හඳුනාගැනීමේ පෙරට්ටුව **අගෝස්තු 21 වැනි දින දක්වා** කල් තැබීමට මහෙස්ත්රාත්වරිය නියෝග කළාය. එසේම, අද දිනයේ අධිකරණයට ඉදිරිපත් කළ සැකකරුවන් සහ අලුතින් නම් කරන ලද සැකකරුවන් 24 දෙනා ද ඇතුළුව සැකකරුවන් 62 දෙනාම අගෝස්තු 21 වැනි දින අධිකරණයට ඉදිරිපත් කරන ලෙසත්, එදින දක්වා ඔවුන් රක්ෂිත බන්ධනාගාරගත කරන ලෙසත් මහෙස්ත්රාත්වරිය වැඩිදුරටත් නියෝග කර ඇත.
ආරක්ෂක හේතූන් මත මෙම සැකකරුවන්ගේ නම් විවෘත අධිකරණයේදී ප්රකාශයට පත් නොකළ අතර, අදාළ නම් ලැයිස්තුව සහ බී වාර්තාව අපරාධ පරීක්ෂණ දෙපාර්තමේන්තුව විසින් මහෙස්ත්රාත්වරිය වෙත භාර දෙන ලදී. පසුගිය ජූලි 5 සහ 6 දිනවල මීගමුව බන්ධනාගාරයේ ඇති වූ මෙම ගැටුමෙන් බන්ධනාගාර නිලධාරීන් 10 දෙනෙකු සහ රැඳවියන් 22 දෙනෙකු ජීවිතක්ෂයට පත්විය.
