බාර්සිලෝනා විවෘත ටෙනිස් තරගාවලිය (Barcelona Open) ජයග්රහණය කරමින් සිය ප්රධාන ප්රතිවාදියා වන ජැනික් සිනර්ගෙන් යළිත් ලෝක අංක එකේ ස්ථානය උදුරා ගැනීමට තමන්ට අමතර පෙළඹවීමක් පවතින බව ස්පාඤ්ඤ සුපිරි ක්රීඩක කාර්ලෝස් අල්කරාස් (Carlos Alcaraz) පවසයි. පසුගිය ඉරිදා මොනාකෝහි පැවති මොන්ටේ කාලෝ අවසන් මහා තරගයෙන් පසු සිනර් වෙත එම ස්ථානය හිමිවූ අතර, මෙවර බාර්සිලෝනාහිදී ශූරතාවය දිනාගතහොත් අල්කරාස්ට යළි පෙරමුණට පැමිණීමට අවස්ථාව හිමිවේ.
අඛණ්ඩව තරගාවලි කිහිපයක් ජයග්රහණය කළ ජැනික් සිනර් මෙම තරගාවලියට සහභාගී නොවීම අල්කරාස්ට වාසිදායක තත්ත්වයකි. “ඔහු නැති අඩුව මට මේ සතියේ දැනෙන එකක් නැහැ,” යනුවෙන් ඔහු මාධ්ය හමුවේදී විහිළුවට මෙන් සඳහන් කළේය. සිය දක්ෂතා දිනෙන් දින වර්ධනය කර ගැනීම ප්රධාන ඉලක්කය වුවද, ලෝක ශ්රේණිගත කිරීම්වල ප්රථම ස්ථානය සඳහා පවතින මෙම සටන තමන්ට විශාල ශක්තියක් වන බව ඔහු වැඩිදුරටත් කියා සිටියේය.
22 හැවිරිදි අල්කරාස් අද (14) දිනයේ ෆින්ලන්තයේ ඔටෝ විර්ටනන් සමඟ සිය පළමු තරගයට ක්රීඩා කිරීමට නියමිතය. මැයි 24 වනදා ආරම්භ වන ප්රංශ විවෘත ටෙනිස් තරගාවලියට පෙර මැඩ්රිඩ් සහ රෝමයේ පැවැත්වෙන තරග සඳහා ද පූර්ණ සූදානමකින් සහභාගී වීම ඔහුගේ අපේක්ෂාවයි. සිනර් වැනි දක්ෂ ක්රීඩකයෙකු සිටීම තමන්ගේ දුර්වලතා හඳුනාගෙන ඒවා නිවැරදි කර ගැනීමට මහඟු පිටිවහලක් වන බව ද අල්කරාස් මෙහිදී අවධාරණය කළේය.
