ලබන මැයි මාසයේදී ජනාධිපති ඩොනල්ඩ් ට්රම්ප් සිදුකිරීමට නියමිත ඓතිහාසික චීන රාජ්ය සංචාරය සඳහා ඔහුගේ පුත් එරික් ට්රම්ප් (Eric Trump) ද එක්වන බව ට්රම්ප් ව්යාපාරික ජාලය (Trump Organization) තහවුරු කර තිබේ. වසර අටකට පසු ඇමෙරිකානු ජනාධිපතිවරයෙකු චීනයට යන පළමු අවස්ථාව මෙය වන අතර, දරුණු වෙළඳ යුද්ධයකින් පසු ලොව වැදගත්ම ද්විපාර්ශ්වික සබඳතාව ස්ථාවර කිරීම මෙහි මූලික අරමුණයි.
එරික් ට්රම්ප් සහ ඔහුගේ බිරිඳ වන ලාරා ට්රම්ප් මෙම සංචාරයට එක්වන්නේ හුදෙක් පෞද්ගලික මට්ටමින් (Personal capacity) බවත්, ඔවුන් කිසිදු නිල හෝ පෞද්ගලික සාකච්ඡාවකට සහභාගී නොවන බවත් ට්රම්ප් ව්යාපාරික ජාලය පවසයි. චීනය තුළ තමන්ට කිසිදු ව්යාපාරික ආයෝජනයක් නොමැති බවත්, ඉදිරියේදී එවැනි ව්යාපාර ආරම්භ කිරීමට සැලසුමක් නොමැති බවත් ඔවුන් අවධාරණය කර ඇත.
කෙසේ වෙතත්, ජනාධිපතිවරයාගේ ව්යාපාරික අධිරාජ්යය මෙහෙයවන එරික් ට්රම්ප් මෙලෙස රාජ්ය සංචාරයකට එක්වීම තුළින් “අභිලාෂයන් අතර ගැටුමක්” (Conflict of interest) නිර්මාණය විය හැකි බවට විචාරකයෝ මත පළ කරති. මීට පෙර හිටපු ජනාධිපති ජෝ බයිඩන්ගේ පුත් හන්ටර් බයිඩන් චීන සංචාරයකට එක්වීම සම්බන්ධයෙන් ට්රම්ප් දැඩි ලෙස විවේචනය කළ බැවින්, මෙම තීරණය දේශපාලනික වශයෙන් ද කතාබහට ලක්ව තිබේ. මැයි 14 සහ 15 යන දිනවල පැවැත්වෙන මෙම සංචාරය මැදපෙරදිග යුද තත්ත්වය හමුවේ කල් දැමුණු එකක් වන අතර, එය ඇමෙරිකා-චීන සබඳතාවල නව පරිච්ඡේදයක ආරම්භය වනු ඇතැයි අපේක්ෂා කෙරේ.
තොරතුරු උපුටා ගැනීම: The Standard, Reuters සහ The Guardian ඇසුරින්
