ඊශ්රායලය සහ ලෙබනනය අතර වසර තිස් දෙකකට පසු ප්රථම වතාවට සෘජු රාජ්ය තාන්ත්රික සාකච්ඡා ආරම්භ වී තිබේ. ඉරානයේ සහය ලබන හිස්බුල්ලා සංවිධානය සහ ඊශ්රායල හමුදා අතර පවතින දරුණු ගැටුම් නිමා කිරීමේ අරමුණින් අමෙරිකානු රාජ්ය ලේකම් මාර්කෝ රුබියෝගේ මැදිහත් වීමෙන් වොෂින්ටන් නුවරදී මෙම සාකච්ඡා පැවැත්විණි. මෙය කලාපය තුළ හිස්බුල්ලා බලපෑම අවසන් කිරීමට ලැබුණු ඓතිහාසික අවස්ථාවක් බව රුබියෝ පෙන්වා දෙයි. මෙම සාකච්ඡාවලදී ඊශ්රායලය අවධාරණය කළේ හිස්බුල්ලා ඇතුළු සියලුම සන්නද්ධ කණ්ඩායම් නිරායුධ කළ යුතු බවයි. ලෙබනනය පවතින මානුෂීය අර්බුදය හමුවේ වහාම සටන් විරාමයක් ප්රකාශ කරන ලෙස ඉල්ලා සිටියේය.
මෙම රාජ්යයන් දෙක අතර අවසන් වරට මෙවැනි ඉහළ මට්ටමේ සාකච්ඡාවක් පවත්වා ඇත්තේ 1993 වසරේදීය. මාර්තු 2 වනදා ආරම්භ වූ ඊශ්රායල හමුදා මෙහෙයුම් හේතුවෙන් මේ වන විට පුද්ගලයන් 2,000කට වැඩි පිරිසක් ජීවිතක්ෂයට පත්ව ඇති බව වාර්තා වේ. සාකච්ඡා පැවැත්වෙන අතරතුරදී පවා හිස්බුල්ලා සංවිධානය ඊශ්රායලයට එරෙහිව ප්රහාර 24ක් එල්ල කළ බව ප්රකාශ කර ඇති අතර, උතුරු ඊශ්රායලයේ ප්රදේශ රැසක රොකට් ප්රහාර පිළිබඳ අනතුරු ඇඟවීමේ සංඥා නිකුත් වී තිබුණි. මෙම සාකච්ඡා ඉදිරියට ගෙන යාම සඳහා දෙපාර්ශවයම එකඟතාවයකට පැමිණ ඇති අතර, ඉදිරි සාකච්ඡා පවත්වන ස්ථානය සහ වේලාව නුදුරේදීම තීරණය කිරීමට නියමිතය.
