අමෙරිකානු ජනාධිපති ඩොනල්ඩ් ට්රම්ප් විසින් ඉල්ලා ඇති ඩොලර් ට්රිලියන 1.5ක වාර්ෂික ආරක්ෂක අයවැය පිළිබඳව පැහැදිලි කිරීමට පැමිණි ධවල මන්දිර අයවැය අධ්යක්ෂ රසල් වොට් (Russell Vought), ඉරාන යුද්ධය සඳහා වැයවන මුළු පිරිවැය පිළිබඳ කිසිදු නිශ්චිත අගයක් ඉදිරිපත් කිරීමට අපොහොසත් වී තිබේ. ඊයේ (15) පැවති නියෝජිත මන්ත්රී මණ්ඩල අයවැය කමිටු හමුවේදී ඔහු කියා සිටියේ, යුද්ධය සඳහා අවශ්ය අරමුදල් ප්රමාණය ගණනය කරමින් පවතින බැවින් ඒ පිළිබඳ “දළ අදහසක්” පවා මේ මොහොතේ ප්රකාශ කළ නොහැකි බවයි.
පෙන්ටගනයේ මූල්ය වගවීම පිළිබඳ පවතින දුර්වලතා පෙන්වා දෙමින් ඩිමොක්රටික් සහ රිපබ්ලිකන් යන පක්ෂ දෙකෙහිම මන්ත්රීවරුන් මෙහිදී රජය දැඩි ලෙස විවේචනය කළහ. විශේෂයෙන්ම සමාජ සුබසාධන වැඩසටහන් කපා හරිමින් මෙලෙස දැවැන්ත ආරක්ෂක පිරිවැයක් ඉල්ලා සිටීම දේශපාලන වශයෙන් දැඩි මතභේදයට තුඩු දී ඇති අතර, යුද්ධය සඳහා අවශ්ය අරමුදල් අනුමත කිරීමේදී කොංග්රසය දැඩි කොන්දේසි පැනවීමට සූදානම් වන බව ද වාර්තා වේ.
