දිට්වා සුළිකුණාටුවෙන් සිදු වූ හානි සඳහා වන වන්දි ලබා දීම සහ ප්රතිසංස්කරණ කටයුතු දිස්ත්රික් මට්ටමින් විශේෂ අවධානයක් යොමු කර කඩිනම් කරන ලෙස අග්රාමාත්ය ආචාර්ය හරිනි අමරසූරිය මහත්මිය අද (21) උපදෙස් ලබා දුන්නාය. ‘Rebuilding Sri Lanka’ වැඩසටහනේ ප්රගතිය විමසා බැලීම සඳහා අරලියගහ මන්දිරයේදී පැවැති සාකච්ඡාවකදී අග්රාමාත්යවරිය අවධාරණය කළේ, පළාත් සභා වෙත අවශ්ය සියලු ප්රතිපාදන දැනටමත් වෙන් කර ඇති බැවින් ප්රාදේශීය මට්ටමින් පවතින ප්රමාදයන් වහාම විසඳිය යුතු බවයි.
දිට්වා ආපදා හානි ප්රතිසංස්කරණය සඳහා වැය කෙරෙන මුළු මුදල ඩොලර් බිලියන 3.4ක් ලෙස ඇස්තමේන්තු කර ඇති අතර, ඒ වෙනුවෙන් රුපියල් බිලියන 500ක් වෙන් කර තිබේ. මෙම සියලු සංවර්ධන හා ප්රතිසංස්කරණ කටයුතු 2026 වසර අවසන් වීමට පෙර නිම කළ යුතු බව අග්රාමාත්යවරිය මෙහිදී සඳහන් කළාය. නිවාස, යටිතල පහසුකම්, කෘෂිකර්ම, පශු සම්පත් සහ ධීවර යන ක්ෂේත්රවලට අදාළ හානි සඳහා වන්දි ගෙවීම් දැනටමත් ක්රියාත්මක වන බව මෙහිදී අනාවරණය විය.
වන්දි ගෙවීමේ ප්රගතිය පිළිබඳව අදහස් දැක්වූ ජනාධිපති ජ්යෙෂ්ඨ අතිරේක ලේකම් ජී.එම්. ආර්.ඩී. අපොන්සු මහතා සඳහන් කළේ රුපියල් 25,000ක සහන දීමනාව ලබා දීම 99%කින් සහ නැවත පදිංචිය සඳහා වන රුපියල් 50,000ක දීමනාව 95%කින් අවසන් කර ඇති බවයි. මීට අමතරව ආපදාවෙන් මියගිය පුද්ගලයෙකු වෙනුවෙන් රුපියල් මිලියනයක වන්දි මුදලක් ද, විපතට පත් පාසල් සිසුන් සඳහා රුපියල් 25,000ක් ද ලබා දීමට කටයුතු සූදානම් කර ඇති බව ඔහු වැඩිදුරටත් පැවසීය.
මෙම සාකච්ඡාවේදී විශේෂ අවශ්යතා සහිත පුද්ගලයින් සඳහා වන්දි ලබා දීම, මව්පියන් අහිමි වූ දරුවන්ගේ සුභසාධනය සහ හානි වූ පාසල් හා රෝහල් ප්රතිසංස්කරණය කිරීම පිළිබඳව ද දීර්ඝ වශයෙන් අවධානය යොමු කෙරිණි. නව නිවාස ඉදිකිරීම සඳහා ඉඩම් වෙන් කර ගැනීම සහ ගොඩනැගිලි පර්යේෂණ ආයතනයේ (NBRO) වාර්තා ලබා ගැනීම කඩිනම් කරන ලෙස ද අග්රාමාත්යවරිය මෙහිදී නිලධාරීන්ට උපදෙස් දුන්නාය.
