පසුගිය වසර දෙකක කාලය පුරා පැවති යුද ගැටුම් හේතුවෙන් විනාශ වූ ගාසා තීරය යළි යථා තත්ත්වයට පත් කිරීම සඳහා ඉදිරි වසර 10 තුළ ඇමෙරිකානු ඩොලර් බිලියන 71.4 ක මුදලක් අවශ්ය වනු ඇති බව එක්සත් ජාතීන්ගේ සංවිධානය සහ යුරෝපා සංගමය නිකුත් කළ නවතම වාර්තාවකින් හෙළි වේ. ලෝක බැංකුව ද හවුල් වී සකස් කළ මෙම ගාසා කඩිනම් හානි සහ අවශ්යතා තක්සේරුව මඟින් පෙන්වා දෙන්නේ ගාසා තීරයේ නිවාස, සෞඛ්ය, අධ්යාපන, වාණිජ සහ කෘෂිකාර්මික අංශයන්ට බරපතල හානි සිදුව ඇති බවයි. මෙම විනාශය හේතුවෙන් ගාසා තීරයේ මානව සංවර්ධනය වසර 77ක් පසුපසට ගොස් ඇති බව ද එම වාර්තාව සඳහන් කරයි.
යුද්ධය හේතුවෙන් ගාසා තීරයේ නිවාසවලින් 85% ක් පමණ විනාශ වී ඇති අතර ඒ සඳහා සිදුව ඇති හානිය ඇමෙරිකානු ඩොලර් බිලියන 18ක් ලෙස ගණන් බලා ඇත. මේ හේතුවෙන් මිලියන 1.2 කට අධික ජනතාවකට සිය නිවාස අහිමි වී ඇති අතර ඔවුන් දැනට ජීවත් වන්නේ සෞඛ්ය පහසුකම් අවම තාවකාලික කූඩාරම් තුළයි. ගාසා නගරය, ඛාන් යුනිස් සහ ජබාලියා යන ප්රදේශ මෙලෙස නිවාස හානියට වැඩි වශයෙන් ලක්වූ ප්රදේශ වේ. වාර්තාවට අනුව ගාසා තීරයේ රෝහල්වලින් 50% කට වඩා වැඩි ප්රමාණයක් මේ වන විට ක්රියා විරහිත මට්ටමක පවතින අතර සෞඛ්ය අංශයට සිදුව ඇති හානිය ඇමෙරිකානු ඩොලර් බිලියන 1.39ක් ලෙස තක්සේරු කර ඇත.
අධ්යාපන අංශය ද බරපතල ලෙස කඩා වැටී ඇති අතර පාසල් සියල්ලම පාහේ විනාශ වී හෝ හානි වී තිබේ. පසුගිය වසර දෙක තුළ ළමුන් සහ තරුණයින් 728,000 කට අධික පිරිසකට අධ්යාපනය අහිමි වී ඇති අතර අධ්යාපන අංශය යළි ගොඩනැගීමට ඇමෙරිකානු ඩොලර් බිලියන 4.71ක් අවශ්ය බව ගණන් බලා තිබේ. ගාසා තීරය යළි ගොඩනැගීම සඳහා ප්රධාන වශයෙන් ස්ථාවර සටන් විරාමයක් සහ ප්රමාණවත් ආරක්ෂාවක් තිබීම අත්යවශ්ය බව එක්සත් ජාතීන්ගේ සංවිධානය සහ යුරෝපා සංගමය අවධාරණය කරයි. ගොඩනැගිලි සුන්බුන් අතර සැඟවී ඇති ටොන් 7,000කට අධික පුපුරා නොගිය බෝම්බ ඉවත් කිරීම ද මෙහිදී විශාල අභියෝගයක් වනු ඇත.
