පන්නිපිටිය ප්රදේශයේ ප්රසිද්ධ පාසලක තාප්පයෙන් පැන නීති විරෝධී ලෙස ඇතුළු වූ තරුණයකු, එහි උසස් පෙළ සිසුන් දෙදෙනකුගේ ගෙලට තියුණු ආයුධයක් තබා මරණ තර්ජනය කර ඇති බව කොට්ටාව පොලිසිය වාර්තා කරයි. විද්යාලයේ නියෝජ්ය විදුහල්පතිනිය විසින් කරන ලද පැමිණිල්ලකට අනුව පොලිසිය මේ පිළිබඳ පරීක්ෂණ පවත්වයි.
මෙවර උසස් පෙළ විභාගයට පෙනී සිටින සිසුන් පිරිසක් පාසල් පිට්ටනිය කෙළවරක වූ ගසකින් අඹ කඩා කමින් සිටියදී අසල නිවසක තරුණයකු ඔවුන්ට බැන වැදී තිබේ. එහිදී සිසුන් එම තරුණයාට “හූ” කියා පාසල තුළට පැමිණ ඇත. ඉන් කෝපයට පත් සැකකාර තරුණයා පසුව පාසල් තාප්පයෙන් පැන ඇතුළට පැමිණ, සිසුන් දෙදෙනකු අල්ලාගෙන ඔවුන්ගේ ගෙලට කිණිස්සක් වැනි ආයුධයක් තබා මරණ තර්ජනය කර තිබේ. සැකකරු අත්අඩංගුවට ගැනීම සඳහා කොට්ටාව පොලිසිය වැඩිදුර විමර්ශන සිදු කරයි.
