මෙක්සිකෝවේ පිහිටි ඓතිහාසික ‘ටියෝටිහුකාන්’ (Teotihuacan) පුරාවිද්යා භූමියේ සිදුවූ වෙඩි තැබීමකින් පසු, එය දැඩි ආරක්ෂක රැකවල් මධ්යයේ බදාදා (22) දින සිට යළි විවෘත කර තිබේ. පසුගිය සඳුදා දින තුවක්කුකරුවෙකු විසින් එල්ල කළ ප්රහාරයකින් කැනේඩියානු ජාතික කාන්තාවක මියගොස් තවත් 13 දෙනෙකු තුවාල ලැබීම හේතුවෙන් මෙම සංචාරක මධ්යස්ථානය තාවකාලිකව වසා දමා තිබුණි. ප්රහාරයෙන් පසු ජාතික ආරක්ෂක බලකායේ සාමාජිකයින් 40 දෙනෙකු ඇතුළු විශාල පොලිස් කණ්ඩායමක් ආරක්ෂාව සඳහා යොදවා ඇති අතර, සන්නද්ධ රථ මඟින් ප්රදේශය මුර සංචාරය කරමින් සංචාරකයන් ඇතුළු වන ස්ථාන පහේදී දැඩි පරීක්ෂාවන් සිදු කරනු ලබයි.
‘චන්ද්ර පිරමිඩය’ (Pyramid of the Moon) අසලදී තුවක්කුකරුවෙකු විසින් මෙම වෙඩි තැබීම සිදු කර ඇති අතර, පසුව ඔහු ද සියදිවි නසාගෙන ඇති බව වාර්තා වේ. මෙම අවාසනාවන්ත සිදුවීමත් සමඟ චන්ද්ර පිරමිඩය මතට නැගීම දැනට තාවකාලිකව අත්හිටුවා ඇත. පසුගිය වසරේදී මිලියන 1.8ක සංචාරක පිරිසක් පැමිණි මෙම ස්ථානය මෙක්සිකෝවේ වඩාත්ම ජනප්රිය සංචාරක ගමනාන්තය වුවද, යළි විවෘත කළ මුල් දිනයේ සංචාරකයන්ගේ පැමිණීම සුපුරුදු මට්ටමට වඩා අඩුවෙන් දක්නට ලැබුණි. මෙක්සිකෝව ලෝක කුසලාන පාපන්දු තරගාවලිය සඳහා සත්කාරකත්වය ලබා දීමට සූදානම් වන පසුබිමක, මෙවැනි ප්රධාන සංචාරක ස්ථානයක ආරක්ෂාව සම්බන්ධයෙන් ජාත්යන්තර අවධානය යොමු වී තිබේ.
