ලෝක ප්රතිශක්තීකරණ සතිය අද (24) සිට අප්රේල් 30 දක්වා ක්රියාත්මක වන බව සෞඛ්ය අමාත්යාංශය නිවේදනය කරයි. ශ්රී ලංකාව ප්රතිශක්තීකරණ වැඩසටහන් අතින් ජාත්යන්තර වශයෙන් ඉතා ඉහළ මට්ටමක පසුවන බව සෞඛ්ය අමාත්යාංශයේ වසංගත රෝග විද්යා අංශයේ ප්රධාන වසංගත රෝග විද්යාඥ පාලිත කරුණාපේම මහතා පසුගියදා පැවති මාධ්ය හමුවකදී ප්රකාශ කළේය.
1978 වසරේ සිට ක්රමානුකූලව ක්රියාත්මක වන මෙරට ප්රතිශක්තීකරණ වැඩපිළිවෙළ හේතුවෙන් පෝලියෝ වැනි භයානක රෝග තුරන් කිරීමටත්, ළමා මරණ අනුපාතය අවම කර සාමාන්ය ආයු කාලය වැඩි කිරීමටත් සුවිශේෂී දායකත්වයක් ලැබී ඇත. 2012 වසරේ සිට ලෝක සෞඛ්ය සංවිධානය අප්රේල් මාසයේ මෙම සතිය සමරනු ලබන අතර, මෙවර ලෝක ප්රතිශක්තීකරණ සතියට සමගාමීව දිවයින පුරා පිහිටි සෞඛ්ය වෛද්ය නිලධාරී කාර්යාල හරහා විශේෂ දැනුවත් කිරීම් සහ වැඩසටහන් රැසක් ක්රියාත්මක කිරීමට සැලසුම් කර තිබේ.
ශ්රී ලංකාවට අවශ්ය එන්නත් යුනිසෙෆ් (UNICEF) ආයතනයේ සහයෝගය මත 2030 වසර දක්වා කිසිදු හිඟයකින් තොරව ලබා ගැනීමට අවශ්ය සියලු කටයුතු සූදානම් කර ඇති බව ද ඒ මහතා වැඩිදුරටත් අවධාරණය කළේය. වසංගත රෝග විද්යා ඒකකය, වෛද්ය සැපයුම් අංශය (MSD), එස්.පී.සී. (SPC) සහ වෛද්ය පර්යේෂණ ආයතනය (MRI) යන ආයතන එක්ව මෙම එන්නත්වල ප්රමිතිය සහ බෙදා හැරීම අඛණ්ඩව සහතික කරනු ලබයි.
