ඩබ්ලිව්. එම්. මෙන්ඩිස් සමාගම රජයට පැහැර හැර ඇති බව කියන එකතු කළ අගය මත බදු (VAT) හිඟ මුදල් කිසිදු අඩුපාඩුවකින් තොරව වහාම පියවන ලෙස කොළඹ අතිරේක මහේස්ත්රාත් ඕෂධ මිගාර මහාරච්චි මහතා අද නියෝග කළේය. 2023 පෙබරවාරි මාසයේ සිට රුපියල් මිලියන 5 බැගින් වූ මාසික වාරික වශයෙන් මෙම හිඟ බදු ගෙවීමට අවසර දෙමින් සහනයක් ලබා දෙන ලෙස විත්ති පාර්ශවය කළ ඉල්ලීම ප්රතික්ෂේප කරමින් මහේස්ත්රාත්වරයා මෙම නියෝගය නිකුත් කරන ලදී.
2016-2017 වර්ෂ සදහා ඩබ්ලිව්. එම්. මෙන්ඩිස් සමාගම පැහැර හැර ඇති රුපියල් මිලියන 996ක බදු මුදල අයකර ගැනීම සඳහා දේශීය ආදායම් කොමසාරිස් ජනරාල්වරයා ගොනු කළ නඩුව සලකා බැලූ අවස්ථාවේදී මෙම තීන්දුව ප්රකාශයට පත් විය. මෙහිදී විත්ති පාර්ශවය වෙනුවෙන් පෙනී සිටි නීතිඥවරුන් කරුණු දක්වමින් කියා සිටියේ සුරාබදු බලපත්රය අත්හිටුවීම සහ සමාගමේ මෙහෙයුම් කටයුතු බැංකු මගින් වෙන්දේසි කිරීමට යොමු කිරීම හේතුවෙන් සමාගම දැඩි මූල්ය අර්බුදයකට මුහුණ දී ඇති බැවින් වාරික ක්රමය සංශෝධනය කරන ලෙසයි. කෙසේ වෙතත්, නියමිත කාලසීමාව ඉක්මවා ඇති බැවින් නීතියට අනුකූලව අදාළ හිඟ මුදල් පියවිය යුතු බව නිරීක්ෂණය කළ මහේස්ත්රාත්වරයා, මෙම විමර්ශනවල ප්රගතිය මැයි 25 වන දින අධිකරණයට වාර්තා කරන ලෙස දේශීය ආදායම් දෙපාර්තමේන්තුවට දැනුම් දුන්නේය.
