ශ්රී ලංකා නාවික හමුදාවෙන් විශ්රාම ගන්නා සාමාජිකයන්ට ජාත්යන්තර නාවික හා සමුද්රීය ක්ෂේත්රයේ රැකියා අවස්ථා උදාකර දීම පිළිබඳ විශේෂ සාකච්ඡාවක් පසුගියදා කොළඹදී පවත්වා තිබේ. ආරක්ෂක නියෝජ්ය අමාත්ය මේජර් ජෙනරාල් (විශ්රාමික) අරුණ ජයසේකර සහ වරාය හා සිවිල් ගුවන් සේවා නියෝජ්ය අමාත්ය ජනිත රුවන් කොඩිතුවක්කු යන මහත්වරුන්ගේ සම සභාපතිත්වයෙන් මෙම හමුව සිදුවිය.
මෙහි ප්රධාන අරමුණ වී ඇත්තේ විශ්රාම යන නාවික සාමාජිකයන්ට ජාත්යන්තරව පිළිගත් වෘත්තීය සුදුසුකම් සහ සහතික පත්ර ලබාගැනීම සඳහා විධිමත් යන්ත්රණයක් සකස් කිරීමයි. ගෝලීය සමුද්රීය කර්මාන්තයට ප්රවේශ වීමට අවශ්ය නීතිමය රාමුව කඩිනමින් සකස් කිරීම සහ අදාළ ආයතන අතර සම්බන්ධීකරණය ශක්තිමත් කිරීම පිළිබඳව ද මෙහිදී අවධානය යොමු විය. නාවික හමුදාධිපතිවරයා ඇතුළු ආරක්ෂක අමාත්යාංශයේ සහ වෙළෙඳ නාවික ලේකම් කාර්යාලයේ ජ්යෙෂ්ඨ නිලධාරීන් පිරිසක් ද මෙම සාකච්ඡාවට එක්ව සිටියහ.
