බ්රිතාන්යයේ තෙවැනි චාල්ස් රජු සහ කැමිලා රැජින සිව්දින නිල සංචාරයක් සඳහා ඇමරිකා එක්සත් ජනපදය වෙත පැමිණ තිබේ. ඇමරිකානු නිදහස් ප්රකාශනයට වසර 250ක් සපිරීම නිමිත්තෙන් සංවිධානය වූ මෙම සංචාරය, චාල්ස් රජුගේ රාජ්ය පාලන කාලය තුළ සිදුකරන වැදගත්ම රාජ්ය තාන්ත්රික මෙහෙයුම ලෙස සැලකේ. වොෂින්ටනයේ ඇන්ඩෲස් ගුවන් හමුදා කඳවුරට පැමිණි රාජකීය යුවළ, ජනාධිපති ඩොනල්ඩ් ට්රම්ප් සහ මෙලනියා ට්රම්ප් විසින් ධවල මන්දිරයේදී උණුසුම් ලෙස පිළිගනු ලැබීය.
මෙම සංචාරය සිදුවන්නේ ඉරාන යුද්ධය සම්බන්ධයෙන් ඇමරිකාව සහ බ්රිතාන්යය අතර යම් මතභේද පවතින පසුබිමක වීම විශේෂත්වයකි. බ්රිතාන්ය අගමැති කයිර් ස්ටාර්මර්ගේ රජය සහ ට්රම්ප් පාලනාධිකාරිය අතර පවතින දේශපාලන නොසන්සුන්තාවය සමනය කර, දෙරට අතර පවතින “සුවිශේෂී සබඳතාව” ශක්තිමත් කිරීම මෙම සංචාරයේ ප්රධාන අරමුණයි. චාල්ස් රජු හෙට දින ඇමරිකානු කොංග්රස් මණ්ඩලය ඇමතීමට නියමිත අතර, එහිදී දෙරට අතර පවතින ඓතිහාසික මිත්රත්වය සහ ප්රජාතන්ත්රවාදී වටිනාකම් පිළිබඳව අදහස් දැක්වීමට නියමිතය.
සංචාරය අතරතුර රාජකීය යුවළ නිව්යෝර්ක් නුවර 9/11 ප්රහාරයෙන් මියගිය පිරිස සැමරීමටත්, වර්ජිනියා ප්රාන්තයේ පරිසර සංරක්ෂණ වැඩසටහන් නිරීක්ෂණය කිරීමටත් සැලසුම් කර ඇත. මෑතකදී වොෂින්ටනයේ සිදු වූ වෙඩි තැබීමේ සිද්ධීන් හමුවේ දැඩි ආරක්ෂක රැකවල් මධ්යයේ මෙම සංචාරය ක්රියාත්මක වේ.
