ලෝකප්රකට ‘Run-DMC’ සංගීත කණ්ඩායමේ සාමාජිකයෙකු වූ ජෑම් මාස්ටර් ජේ (Jam Master Jay) 2002 වසරේදී ඝාතනය කිරීම සම්බන්ධයෙන් චෝදනා ලැබ සිටි පුද්ගලයෙකු එම අපරාධයට තමන් සම්බන්ධ බව පිළිගනිමින් ෆෙඩරල් අධිකරණය හමුවේ වරදකරු වී තිබේ. ඒ අනුව දශක දෙකකට අධික කාලයක් අභිරහසක්ව පැවති මෙම ඝාතනයේ තීරණාත්මක තොරතුරු රැසක් දැන් අනාවරණය වී ඇත.
ඝාතනය සම්බන්ධයෙන් චෝදනා ලැබ සිටි 52 හැවිරිදි ජේ බ්රයන්ට් (Jay Bryant) අධිකරණය හමුවේ ප්රකාශ කළේ, ජේසන් මිසෙල් (ජෑම් මාස්ටර් ජේ) ඔහුගේ පටිගත කිරීමේ මැදිරිය තුළදී සැඟවී සිට පහර දීමට (Ambush) තමන් තවත් පිරිසකට සහය වූ බවයි. “එම අවස්ථාවේදී ජේසන් මිසෙල්ට වෙඩි තැබීම සඳහා ගිනි අවියක් භාවිතා කරන බව මා දැන සිටියා. මා කළේ වැරදි සහගත අපරාධයක් බව මම දන්නවා” යනුවෙන් ඔහු විනිසුරුවරයා හමුවේ පාපොච්චාරණය කළේය.
ජේ බ්රයන්ට් විසින් ඝාතනයට සම්බන්ධ වූ අනෙක් පුද්ගලයින්ගේ නම් ප්රකාශ නොකළ ද, 2024 වසරේදී පැවති නඩු විභාගයකින් පසුව කාල් ජෝර්ඩන් සහ රොනල්ඩ් වොෂින්ටන් යන දෙදෙනා ද මෙම ඝාතනයට වරදකරුවන් වී තිබුණි. හිප්-හොප් (Hip-hop) සංගීත ක්ෂේත්රයේ දැවැන්තයෙකු ලෙස සැලකෙන ජෑම් මාස්ටර් ජේගේ ඝාතනය වසර ගණනාවක් පුරා විසඳාගත නොහැකි වූ අභිරහසක් ලෙස පැවති අතර, මෙම පාපොච්චාරණයත් සමඟ ඔහුගේ රසිකයන්ට සහ පවුලේ සාමාජිකයින්ට සාධාරණය ඉටුවනු ඇතැයි බොහෝ දෙනා බලාපොරොත්තු වෙති.
