ඕස්ට්රේලියාවට ගෙවීමට තිබූ ඇමරිකානු ඩොලර් ලක්ෂ විසිපහක (ඩොලර් මිලියන 2.5ක) ණය මුදලක් සයිබර් ප්රහාරයක් මගින් වෙනත් පාර්ශවයකට බැර වීමේ සිද්ධිය සම්බන්ධයෙන් කරුණු විමසීමට මුදල් ලේකම්වරයා රජයේ මුදල් පිළිබඳ කාරක සභාව (COPF) හමුවට කැඳවුවද ඔහු එය මගහැර ඇති බව එම කාරක සභාවේ සභාපති ආචාර්ය හර්ෂ ද සිල්වා මහතා පවසයි.
විදේශ සම්පත් දෙපාර්තමේන්තුවේ (ERD) පරිගණක පද්ධතියට සයිබර් ප්රහාරකයන් ඇතුළු වී ඕස්ට්රේලියාවට ගෙවීමට තිබූ ඩොලර් මිලියන 2.5ක මුදලක් වංචනික ලෙස වෙනත් ගිණුමකට හරවා ගෙන ඇති බව මුදල් අමාත්යාංශය මීට පෙර තහවුරු කර තිබුණි. මෙම සිදුවීම 2025 දෙසැම්බර් සහ 2026 ජනවාරි අතර කාලයේ සිදුව ඇති බව වාර්තා වේ.
මේ සම්බන්ධයෙන් කරුණු විමසීමට මුදල් අමාත්යාංශයේ සහ මහා භාණ්ඩාගාරයේ ලේකම් ආචාර්ය හර්ෂණ සූරියප්පෙරුම මහතා අද (28) පාර්ලිමේන්තු මුදල් කාරක සභාව හමුවට කැඳවා තිබුණද ඔහු පැමිණ නැත. අප්රේල් 22 වැනිදා මේ පිළිබඳ ලිඛිතව දැනුම් දුන් බව හර්ෂ ද සිල්වා මහතා සඳහන් කළේය.
මෙම සයිබර් ප්රහාරය පිළිබඳව තමාට සියයට 99ක සැකයක් පවතින බවත් මෙය හුදෙක් පරිගණක පද්ධතියකට ඇතුළු වීමක් නොව වෙනත් බැරෑරුම් තත්ත්වයක් විය හැකි බවත් සභාපතිවරයා පවසයි. පළමු වතාවට දේශපාලඥයෙකු මුදල් අමාත්යාංශයට පත් කිරීම මෙම පරිපාලනමය ගැටලුවලට හේතුව බවද ඔහු වැඩිදුරටත් අවධාරණය කළේය.
මහා භාණ්ඩාගාරය විසින් සිදුකරන ගෙවීම් සම්බන්ධයෙන් ජනතාව තුළ පවතින විශ්වාසය බිඳවැටීමට මෙම සිදුවීම සෘජුවම බලපාන බැවින් මුදල් ලේකම්වරයා කඩිනමින් පාර්ලිමේන්තුවට මේ පිළිබඳ කරුණු ඉදිරිපත් කළ යුතු බව කාරක සභාවේ ස්ථාවරය වී තිබේ. දැනට මෙම සිදුවීම සම්බන්ධයෙන් රහස් පොලිසිය (CID) සහ මූල්ය බුද්ධි ඒකකය (FIU) හරහා පරීක්ෂණ ක්රියාත්මක වේ.
