රාජ්ය අංශයේ කාර්යක්ෂමතාව ඉහළ නංවා මහජනතාවට ගුණාත්මක සේවාවක් සැපයීම සඳහා “මහජන සේවා ප්රශස්තකරණය සඳහා බලපෑම් කළ හැකි ආයතනික නියමු ජාලය” හෙවත් ‘PIC-Net’ (Public Impact Champions Network) ස්ථාපිත කිරීමට රජය පියවර ගෙන තිබේ. රජයේ ඩිජිටල් ආර්ථික සැලැස්මේ ප්රධාන අංගයක් ලෙස ක්රියාත්මක මෙම වැඩපිළිවෙළ මගින් රාජ්ය ආයතන තුළ ආයතනික මට්ටමින් පුළුල් ඩිජිටල් පරිවර්තනයක් ඇති කිරීම අපේක්ෂා කෙරේ. ජනාධිපති ලේකම් ආචාර්ය නන්දික සනත් කුමානායක මහතා විසින් චක්රලේඛයක් නිකුත් කරමින් සියලුම අමාත්යාංශ සහ රජයේ ආයතන ප්රධානීන් මේ පිළිබඳව දැනුවත් කර ඇත.
මෙම නව වැඩපිළිවෙළ යටතේ සෑම රාජ්ය ආයතනයක්ම සිය සේවක මණ්ඩලය අතරින් නියමුවන් සිව් දෙනෙකුගෙන් යුත් විශේෂ කණ්ඩායමක් තෝරා පත් කර ගත යුතුය. තාක්ෂණික භාවිතය, සේවා අත්දැකීම් සහ ක්රියාවලි කාර්යක්ෂමතාව ඉහළ නැංවීමට සාමුහිකව වගකීම දරන මෙම කණ්ඩායම, අදාළ ආයතනය තුළ සිදුවන ඩිජිටල් පරිවර්තන ක්රියාවලියේ කේන්ද්රීය බලවේගය ලෙස කටයුතු කරනු ඇත. මෙමගින් දිවයින පුරා විසිරුණු 400 දෙනෙකුගෙන් පමණ සමන්විත ඩිජිටල් පරිවර්තන නියමුවන්ගේ ජාතික කණ්ඩායමක් නිර්මාණය වීමට නියමිතය.
තෝරාගනු ලබන නියමුවන්ට ඩිජිටල් පරිවර්තනය, සේවා ප්රතිසැලසුම්කරණය සහ වෙනස්කම් කළමනාකරණය වැනි විෂයයන් සම්බන්ධයෙන් විධිමත් පුහුණුවක් සහ විශේෂඥ මඟපෙන්වීම් ලබාදීමට කටයුතු යොදා ඇත. ජනාධිපති ලේකම් කාර්යාලය, ඩිජිටල් ආර්ථික අමාත්යාංශය සහ GovTech Sri Lanka ආයතනය එක්ව මෙම සමස්ත ක්රියාවලිය සම්බන්ධීකරණය කරනු ලබයි. ආසියානු සංවර්ධන බැංකුවේ (ADB) සහාය ඇතිව ක්රියාත්මක වන මෙම වැඩසටහන හරහා රාජ්ය සේවය වඩාත් නවීන සහ ජනතාවට හිතකාමී සේවාවක් බවට පත් කිරීම රජයේ මූලික ඉලක්කයයි.
