ඉංගිරිය පොලිස් වසමට අයත් දොඹගස්කන්ද රක්ෂිතයේ වැඩබිමක් තුළ 2026.05.12 වන දින දහවල් සිදුවූ අනතුරකින් බරපතළ තුවාල ලැබූ පුද්ගලයෙකු ජීවිතක්ෂයට පත්ව තිබේ. මියගිය පුද්ගලයා ඉංගිරිය රෝහලට ඇතුළත් කිරීමෙන් පසු මෙලෙස මියගොස් ඇති බව පොලිසියට වාර්තා වී ඇත. මෙලෙස අවාසනාවන්ත ලෙස ජීවිතක්ෂයට පත්ව ඇත්තේ පොඩිතමුව ප්රදේශයේ පදිංචිව සිටි 60 හැවිරිදි පුද්ගලයෙකි.
සිද්ධිය සම්බන්ධයෙන් සිදුකළ විමර්ශනවලදී අනාවරණය වී ඇත්තේ, මියගිය පුද්ගලයා දොඹගස්කන්ද රක්ෂිතයේ ගිනිසපු ගස් කපා දැව ලබාගැනීමේ ව්යාපෘතියක සේවය කරමින් සිට ඇති බවයි. එහිදී ඩෝසරයක් ආධාරයෙන් බිම හෙළන ලද ගසක අත්තක් සිරුරේ වැදීමෙන් මෙම අනතුර සිදුව ඇත. ඉංගිරිය පොලිසිය සිද්ධිය සම්බන්ධයෙන් වැඩිදුර විමර්ශන මෙහෙයවනු ලබයි.
