අතින් ස්පර්ශ කළ නොහැකි වුවද අපේ සංස්කෘතික අනන්යතාවයේ ජීවය බඳු අස්පර්ශනීය උරුමයන් වර්තමාන වේගවත් සමාජ පරිවර්තනය හමුවේ ක්රමයෙන් අභාවයට යාමේ දැඩි තර්ජනයකට ලක්ව තිබේ. පරපුරෙන් පරපුරට මුඛ පරම්පරාගතව පැමිණි දේශීය වෙදකම, ගැඹුරු ශාස්ත්රීය බෙර වාදන සහ පහන්මඩු වැනි අතිශය දුර්ලභ සංස්කෘතික අංගයන් කාලයාගේ ඇවෑමෙන් වැළලී යාමට ඉඩ නොදී මතු පරපුර උදෙසා සුරක්ෂිත කිරීමේ දැවැන්ත අභියෝගය ජාතික මට්ටමින් ජයගත යුතුව ඇත. ලෝක මට්ටමින් යුනෙස්කෝ සංවිධානය (UNESCO) 2003 වසරේදී සම්මත කරගත් ප්රඥප්තියකට අනුව (2008 දී බලාත්මක වූ) මෙම අගනා උරුමයන් ජාත්යන්තර අවධානයට යොමු කිරීමේ ක්රියාවලිය දැන් ශ්රී ලංකාව තුළ වඩාත් තීව්ර වී තිබේ.
සබරගමුව පළාත් ආණ්ඩුකාර චම්පා ජානකී රාජරත්න මහත්මියගේ ප්රධානත්වයෙන් පසුගියදා ආරම්භ කෙරුණු විශේෂ වැඩසටහන හරහා මෙම උරුමයන් නිසි ලෙස ලේඛනගත කර සංරක්ෂණය කිරීමේ නවතම මෙහෙයුම ක්රියාත්මක වේ. පුස්තකාල හා ප්රලේඛන සේවා මණ්ඩලයේ පූර්ණ මඟපෙන්වීම යටතේ ක්රියාත්මක වන මෙම ව්යාපෘතිය මගින් සබරගමුවට ආවේණික වූ ශ්රී පාද කරුණාවේ චාරිත්ර, සාම්ප්රදායික පෙරහැර මංගල්යයන්, කිරිඅම්මා දානය වැනි ආගමික හා සමාජීය වටිනාකම් සහිත සියලු අස්පර්ශනීය දත්ත එක්රැස් කිරීමට නියමිතය. මෙමගින් අපේ දේශීය අනන්යතාවයන් ජාත්යන්තර පර්යේෂණ කලාපයට විවෘත වන අතරම, ඒවායේ හිමිකාරිත්වය ලෝකය හමුවේ තහවුරු කිරීමටද මග පෑදේ.
මෙම සුවිශේෂී දත්ත පද්ධතිය මගින් අපේක්ෂා කරන්නේ හුදෙක් තොරතුරු රැස් කිරීමක් පමණක් නොව, ශ්රී ලාංකේය උරුමය යුනෙස්කෝ ජාත්යන්තර ලේඛනයන්ට ඇතුළත් කරමින් ගෝලීය පිළිගැනීම ලබා දීමයි. අපේ මුතුන් මිත්තන් දිවි හිමියෙන් ආරක්ෂා කළ මේ මහා සංස්කෘතික දායාදය, හෙට දවසේ උපදින දරුවන්ට උරුම කර දීම අප සැමගේ පරම වගකීමකි. මන්දයත්, ජාතියක සැබෑ ආත්මය රැඳී පවතින්නේ අතින් ඇල්ලිය හැකි ගොඩනැගිලි මත නොව, හදවතින් විඳිය හැකි මෙවැනි අසමසම සංස්කෘතික ශක්තියක් තුළ බැවිනි.
