ශ්රී ලාංකික දෙමළ ජනතාවට එරෙහිව සිදු වූ බව කියන ජනසංහාරය පිළිගනිමින් සහ ඒ පිළිබඳව ජාත්යන්තර අපරාධ පරීක්ෂණයක් ඉල්ලා 2013 වසරේදී තමිල්නාඩු ප්රාන්ත සභාව සම්මත කළ යෝජනාව යළි ස්ථිර කරන ලෙස පාර්ලිමේන්තු මන්ත්රී ගජේන්ද්රකුමාර් පොන්නම්බලම් මහතා තමිල්නාඩු මහ ඇමැති ජෝසප් විජේ මහතාගෙන් ඉල්ලා සිටියි.මැයි 10 වනදා නිකුත් කළ විශේෂ ප්රකාශයක් මඟින් මහ ඇමැති ධුරයට පත්වූ විජේ මහතාට සුබ පැතුම් එක් කරමින් මන්ත්රීවරයා මෙම ඉල්ලීම ඉදිරිපත් කර තිබේ.
2009 වසරේ සිට ශ්රී ලාංකික දෙමළ ජනතාව මැයි 18 වනදා “මුල්ලිවයික්කාල් ජනසංහාර දින” ලෙස සමරන බව පෙන්වා දෙන පොන්නම්බලම් මහතා, 2013 වසරේදී තමිල්නාඩු ප්රාන්ත සභාව ඒකමතිකව ශ්රී ලංකාවේ ජනසංහාරයක් සිදු වූ බවට යෝජනාවක් සම්මත කළ බව සිහිපත් කළේය. එවකට විජේ මහතාගේ TVK පක්ෂය නොතිබුණ ද, වත්මන් රජයට එම ස්ථාවරය යළි තහවුරු කිරීමට අවස්ථාව ඇති බව ඔහු පවසයි.
ලබන මැයි මාසයේ පැවැත්වෙන ප්රාන්ත සභා ආරම්භක සැසියේදීම මෙම යෝජනාව යළි ස්ථිර කිරීමෙන් තමිල්නාඩුව ශ්රී ලාංකික දෙමළ ප්රශ්නය සම්බන්ධයෙන් ස්ථාවර සහ දැඩි ස්ථාවරයක සිටින බව ලෝකයට පෙන්විය හැකි බව මන්ත්රීවරයා සඳහන් කරයි. මෙමඟින් ජාත්යන්තර අපරාධ පරීක්ෂණයක් සඳහා වන ඉල්ලීම ශක්තිමත් වන අතර, එය විජේ මහතා කෙරෙහි ලොව පුරා සිටින දෙමළ ජනතාවගේ ගෞරවය දිනා ගැනීමට හේතු වනු ඇති බව ද ලිපිය මඟින් පෙන්වා දී තිබේ.
තමිල්නාඩුවේ නව නායකත්වය ශ්රී ලාංකික දෙමළ ජනතාවට යුක්තිය ඉටු කිරීම සඳහා වන සහයෝගය අඛණ්ඩව ලබා දෙනු ඇතැයි යන අපේක්ෂාව මෙම ඉල්ලීම හරහා අවධාරණය කර ඇත.
