ඊශ්රායලයේ ආපනශාලා ක්ෂේත්රයේ රැකියා සඳහා සුදුසුකම් ලබා මාස 15කට අධික කාලයක් පද්ධතියේ රැඳී සිටින තරුණයින් පිරිසක් අද (15) කොළඹ ජනාධිපති ලේකම් කාර්යාලය ඉදිරිපිට විරෝධතාවයක නිරත වූහ. 2024 වසරේදී ක්රියාත්මක වූ ‘Israel Reston’ වැඩසටහන යටතේ ප්රථමයෙන් තේරී පත් වූ 500කට අධික පිරිසක් මෙම ප්රමාදය හේතුවෙන් දැඩි දුෂ්කරතාවයට පත්ව සිටින බව ඔවුහු මෙහිදී පෙන්වා දුන්හ. කිලෝමීටර් දෙකක් විනාඩි 11කින් දිවීම සහ කිලෝග්රෑම් 50ක වැලි කොට්ටයක් රැගෙන මීටර් 100ක් දිවීම වැනි දැඩි ශාරීරික පරීක්ෂණවලින් තමන් සමත් වුවද, බලධාරීන් එම සුදුසුකම් නොසලකා හරිමින් අලුතින් බඳවා ගන්නා පිරිස් වෙත ප්රමුඛතාවය ලබා දෙන බවට විරෝධතාකරුවෝ චෝදනා කරති.
මෙම රැකියා අවස්ථාවන් අපේක්ෂාවෙන් සිය ස්ථිර රැකියා පවා අතහැර දැමූ තරුණයින් වසරකට වැඩි කාලයක් ආර්ථික වශයෙන් දැඩි පීඩනයකට ලක්ව සිටින අතර, තමන්ව පද්ධතියෙන් ඉවත් කිරීමට දරන උත්සාහය වහා නතර කරන ලෙස ඔවුහු බලධාරීන්ගෙන් ඉල්ලා සිටිති. 2025 පෙබරවාරි වන විට රැකියා තහවුරු කිරීමේ පණිවිඩ ලබා දෙන බවට මීට පෙර පොරොන්දු වුවද එය මෙතෙක් ඉටු වී නොමැති බවත්, මේ සම්බන්ධයෙන් ජනාධිපති අනුර කුමාර දිසානායක මහතා සහ විජිත හේරත් මහතා මැදිහත් වී මානුෂීය පදනම මත තමන්ට යුක්තිය ඉටු කර දෙනු ඇතැයි තමන් බලාපොරොත්තු වන බවත් ඔවුහු වැඩිදුරටත් සඳහන් කළහ.
