ලොව පුරා සීඝ්රයෙන් ප්රචලිත වන නිකොටින් පැකට් (Nicotine Pouches) පාලනය කිරීම සඳහා රජයන් වඩාත් දැඩි ක්රියාමාර්ග ගත යුතු බව ලෝක සෞඛ්ය සංවිධානය (WHO) 2026 මැයි 15 වන සිකුරාදා දින අවධාරණය කළේය. මෙම නිෂ්පාදන ඇබ්බැහි වීම සඳහාම සුවිශේෂී ලෙස නිර්මාණය කර ඇති බවත්, විශේෂයෙන්ම තරුණ ප්රජාව ඉලක්ක කරගනිමින් ඒවා දැඩි ලෙස ප්රවර්ධනය කරන බවත් එම සංවිධානය පෙන්වා දෙයි.මෙම පැකට් උඩු තොල යටින් තබා ගැනීම මගින් ශරීරයට නිකොටින් උරා ගැනීමට සලස්වන අතර, දුම්වැටි භාවිතය අඩු වෙමින් පවතින පසුබිමක ප්රධාන දුම්කොළ සමාගම් සිය ලාභය පවත්වා ගැනීම සඳහා මෙම නිෂ්පාදන ප්රධාන මෙවලමක් ලෙස භාවිත කරයි. තරුණ පිරිස් ආකර්ෂණය කර ගැනීම සඳහා විවිධ රසයන් (Flavours) සහ ආකර්ෂණීය ඇසුරුම් භාවිත කරන අතර, ඉතා වේගයෙන් හා දැඩි ලෙස ශරීරයට නිකොටින් ඇතුළු වන අයුරින් මේවා තාක්ෂණිකව නිපදවා ඇත. සමාජ මාධ්ය ජාලා, ප්රසිද්ධ පුද්ගලයින් (Influencers), සංගීත ප්රසංග, උත්සව සහ ෆෝමියුලා 1 වැනි ක්රීඩා තරඟ අනුග්රාහකත්වය හරහා තරුණ ප්රේක්ෂකයින් ඉලක්ක කරගනිමින් මෙම නිෂ්පාදන ප්රවර්ධනය කරන බව ලෝක සෞඛ්ය සංවිධානය නිරීක්ෂණය කර තිබේ.ලෝක සෞඛ්ය සංවිධානයේ සෞඛ්ය නිර්ණායක පිළිබඳ අධ්යක්ෂ එටියන් කෘග් මහතා පවසන්නේ මෙම නිෂ්පාදන හුදෙක්ම ඇබ්බැහි වීම සඳහා නිර්මාණය කර ඇති බවයි. දුම්වැටි භාවිතයෙන් ඉවත් වීමට මෙය උපකාරී වන බව කර්මාන්ත පාර්ශ්වයන් පැවසුවද, තරුණ පරපුර ඇබ්බැහි වීමෙන් ආරක්ෂා කර ගැනීම සඳහා රජයන් වහාම මැදිහත් විය යුතු බව ලෝක සෞඛ්ය සංවිධානය වැඩිදුරටත් සඳහන් කරයි.
