රුපියල දිගින් දිගටම අවප්රමාණය වීම හේතුවෙන් ඉදිරියේදී ඉන්ධන මිල, විදුලිය, ජල බිල්පත් සහ අනෙකුත් අත්යවශ්ය භාණ්ඩවල මිල ඉහළ යා හැකි බව ආර්ථික විශ්ලේෂකයින් පෙන්වා දෙයි. මේ සම්බන්ධයෙන් අදහස් දැක්වූ ආර්ථික විශ්ලේෂක ධනනාත් ප්රනාන්දු මහතා සඳහන් කළේ, ශ්රී ලංකා මහ බැංකුව පද්ධතියේ ඇති ඩොලර් මිලදී ගැනීම සහ රුපියල් පද්ධතියේ වැඩිපුර තිබීම හේතුවෙන් ඩොලරයට ඇති ඉල්ලුම ඉහළ ගොස් ඇති බවයි.
මීට අමතරව ලෝකයේ පවතින භූ දේශපාලන තත්ත්වය හේතුවෙන් සංචාරක කර්මාන්තයෙන් ලැබෙන ඩොලර් ප්රමාණය අඩුවීම සහ අපනයන ක්ෂේත්රයට එල්ල වී ඇති බලපෑම ද රුපියල අවප්රමාණය වීමට හේතු වී තිබේ. රුපියල මෙලෙස දුර්වල වීම ඛනිජ තෙල් ආනයන පිරිවැය සෘජුවම ඉහළ නැංවීමට බලපාන අතර, ඒ හරහා උද්ධමනය ඉහළ ගොස් විදුලි සහ ජල බිල්පත් මෙන්ම පොදු පාරිභෝගික භාණ්ඩවල මිල ද ඉහළ යනු ඇති බව ඔහු වැඩිදුරටත් අනාවැකි පළ කළේය.
ශ්රී ලංකා මහ බැංකුවේ දත්තවලට අනුව, අද (15) දින අමෙරිකානු ඩොලරයක විකුණුම් මිල රුපියල් 331.15 ක් ලෙස සටහන් වූ අතර, මෙය 2023 දෙසැම්බර් 22 වැනි දිනෙන් පසු වාර්තා වූ ඉහළම විකුණුම් මිල වේ. ඊයේ දිනයේදී ද ඩොලරයේ විකුණුම් මිල රුපියල් 329.92 ක් දක්වා ඉහළ ගොස් තිබුණි.
