ළදරු වයසින්ම දැරියන් මව්වරුන් බවට පත්වීමේ බාලවයස්කාර ගැබ් ගැනීම් ප්රවණතාවක් වර්තමාන සමාජය තුළ නිරීක්ෂණය වන බැවින්, ඒ පිළිබඳව දරුවන් මෙන්ම දෙමාපියන් ද දැනුවත් කිරීම අතිශය කාලෝචිත බව ශ්රී ලංකා පොලිසිය පවසයි. පොලිස් ස්ථානවලට ලැබෙන පැමිණිලිවලට අනුව, මව්පියන්ගේ අධික කාර්යබහුලත්වය නිසා පවුල තුළින් ගිලිහී යන සෙනෙහස සහ අවධානය බාහිර පුද්ගලයන්ගෙන් හෝ ජංගම දුරකථන සහ සමාජ මාධ්ය හරහා පියවා ගැනීමට දැරියන් පෙළඹීම මෙම තත්ත්වයට ප්රධාන හේතුවක් වී තිබේ. මෙවැනි අවාසනාවන්ත තත්ත්වයන්ගෙන් දැරියන් මුදවා ගැනීම සඳහා පොලිසිය විසින් දෙමාපියන් සහ දැරියන් වෙනුවෙන් විශේෂ උපදෙස් මාලාවක් නිකුත් කර ඇත.
දෙමාපියන් සහ වැඩිහිටියන් විසින් දැරියට මුහුණ පෑමට සිදුවන ඕනෑම ගැටලුවක් හෝ අනිසි යෝජනාවක් කිසිදු බියකින් තොරව මව්පියන්ට පැවසිය හැකි සුහද වටපිටාවක් නිවස තුළ නිර්මාණය කළ යුතු අතර, දරුවන්ට අවශ්ය ආදරය, දයාව සහ සෙනෙහස නොඅඩුව ලබාදීමට පියවර ගත යුතුය. එමෙන්ම, නවීන තාක්ෂණය සහ සමාජ මාධ්ය පරිශීලනය කිරීමේදී ඇය පවත්වන සබඳතා පිළිබඳව නිරන්තර අවධානයෙන් පසුවීම ද වැදගත් වේ. දරුවාගේ හදිසි චර්යාත්මක වෙනස්කම්, අධ්යාපනයට ඇති උනන්දුව අඩු වීම හෝ නිරන්තරයෙන් දුරකථනයේ රැඳී සිටිමින් රහස්යභාවය රැකීමට උත්සාහ කිරීමක් නිරීක්ෂණය වන්නේ නම්, ඒ පිළිබඳ සොයා බලා සුහදව සාකච්ඡා කිරීම හෝ උපදෙස් ලබාදීම දෙමාපියන් සතු වගකීමකි.
මව්පිය රැකවරණය යටතේ වුව ද දැරියන් වශයෙන් මෙවැනි අපරාධවලට ගොදුරුවීමෙන් වැළැකීමට දැරියන් ද විශේෂයෙන්ම බුද්ධිමත් විය යුතුය. එහිදී ෆේස්බුක්, ඉන්ස්ටග්රෑම් හෝ වට්ස්ඇප් හරහා හඳුනාගන්නා ආගන්තුක පුද්ගලයන් විශ්වාස නොකිරීම සහ පෞද්ගලික තොරතුරු, ඡායාරූප හෝ වීඩියෝ පට හුවමාරු කරගැනීමෙන් වැළකිය යුතුය. යම් බියක්, සැකයක් හෝ කරදරයක් දැනෙන සෑම අවස්ථාවකදීම එය නොසඟවා වහාම මව්පියන්ට, විදුහල්පතිවරයාට හෝ විදුහල්පතිනියට, ගුරුවරියකට හෝ සමීපතම විශ්වාසවන්ත වැඩිහිටියකුට දැනුම්දීමට දැරියන් කටයුතු කළ යුතුය.
මෙවැනි කරුණු කෙරෙහි අවධානය යොමු කිරීමෙන් අනිසි ළමා ගැබ්ගැනීම් සහ අපරාධ වළක්වා ගත හැකි අතර, යම් අනතුරක් හෝ අපයෝජන බලපෑමක් සිදුවුවහොත් වහාම ළඟම පිහිටි පොලිස් ස්ථානයට හෝ 119, 118, 109, 107 යන පොලිස් ක්ෂණික ඇමතුම් අංක වෙත දැනුම් දෙන ලෙස ශ්රී ලංකා පොලිසිය ජනතාවගෙන් ඉල්ලා සිටියි.
