නියමිත පාලන මිලට වඩා වැඩි මිලට පානීය ජල බෝතලයක් සහ සම්බා සහල් කිලෝවක් අලෙවි කළ අම්පාර ප්රදේශයේ වෙළෙඳුන් දෙදෙනෙකුට රුපියල් ලක්ෂ 3ක දඩයක් පැනවීමට අම්පාර මහේස්ත්රාත් අධිකරණය නියෝග කර තිබේ.
පාරිභෝගික කටයුතු පිළිබඳ අධිකාරියේ අම්පාර දිස්ත්රික් කාර්යාලය විසින් සිදුකළ වැටලීමකට අදාළව අධිකරණය හමුවේ පෙනී සිටි මෙම වෙළෙඳුන් දෙදෙනා තමන් කළ වරද පිළිගෙන ඇත. ඒ අනුව, රුපියල් 100ක උපරිම මිලක් සහිත වතුර බෝතලයක් රුපියල් 130කට (රුපියල් 30ක් වැඩියෙන්) විකිණූ ආපනශාලා වෙළෙන්දෙකුට රුපියල් ලක්ෂ එකහමාරක (150,000) දඩයක් සහ රුපියල් 230ක් වටිනා සම්බා සහල් කිලෝවක් රුපියල් 250කට (රුපියල් 20ක් වැඩියෙන්) අලෙවි කළ වෙළෙන්දෙකුට රුපියල් ලක්ෂ එකහමාරක දඩයක් වශයෙන් මෙම ලක්ෂ 3ක සමස්ත දඩ මුදල නියම විය.
භාණ්ඩ මිල දී ගැනීමේදී එහි සඳහන් උපරිම සිල්ලර මිල (MRP) පරීක්ෂා කිරීමත්, අනිවාර්යයෙන්ම බිල්පතක් ලබාගැනීමත් පාරිභෝගිකයන් සතු වගකීමක් බව පාරිභෝගික කටයුතු පිළිබඳ අධිකාරිය අවධාරණය කරයි. පාලන මිල ඉක්මවා වැඩි මිලට භාණ්ඩ අලෙවි කරන වෙළෙඳුන් පිළිබඳව තොරතුරු පවතින්නේ නම්, වහාම පාරිභෝගික කටයුතු පිළිබඳ අධිකාරියේ 1977 යන හදිසි කෙටි ඇමතුම් අංකයට දැනුම් දෙන ලෙස ද අධිකාරිය මහජනතාවගෙන් ඉල්ලා සිටියි.
