ඉදිරියේදී දිවයින පුරා දන්සැල් පැවැත්වීමේදී පාරිභෝගික ජනතාව සහ වාහන ඒ වෙත යොමුකරවා ගැනීම සඳහා බෞද්ධ කොඩි (Buddhist Flags) අවභාවිත කිරීමෙන් මුළුමනින්ම වැළකී, ඒ වෙනුවට සාමාන්ය කහ පැහැති කොඩි පමණක් භාවිත කළයුතු බව බෞද්ධ කටයුතු කොමසාරිස් (සංවර්ධන) අසේල මධුසංඛ මහතා අවධාරණය කරයි. මෙවර රාජ්ය වෙසක් උත්සවයේ (State Vesak Festival) සංවිධාන කටයුතු පිළිබඳව මාධ්ය දැනුම්වත් කිරීම සඳහා අද (18) රජයේ ප්රවෘත්ති දෙපාර්තමේන්තුවේ පැවැති විශේෂ මාධ්ය හමුවට එක්වෙමින් කොමසාරිස්වරයා මේ බව ප්රකාශ කළේය.
මීට අදාළ විශේෂ රාජ්ය නිවේදනය අමාත්ය මණ්ඩල (Cabinet) අනුමැතිය ඇතිව දැනටමත් නිල චක්රලේඛයක් ලෙස නිකුත් කර ඇති බව පෙන්වා දුන් ඒ මහතා, ඒ පිළිබඳව වැඩිදුරටත් මෙසේ අදහස් දැක්වීය:
“දන්සැල් පැවැත්වීමේදී සිදුවන ඇතැම් නොගැලපෙන ක්රියාවන් වැළැක්වීම සඳහා අපි මේ වෙනකොට සමස්ත ලංකාවටම බලපාන පරිදි විශේෂ චක්රලේඛයක් නිකුත් කරලා තියෙනවා. ඒ අනුව දන්සැල් සඳහා ජනතාව සහ වාහන යොමු කිරීමේදී උතුම් වූ බෞද්ධ කොඩිය භාවිතා නොකොට, ඒ සඳහා සාමාන්ය කහ පැහැති කොඩියක් පමණක් භාවිත කළ යුතුයි. කැබිනට් අනුමැතිය සහිතව නිකුත් කළ මෙම චක්රලේඛය මේ වන විටත් දිවයිනේ සියලුම දිස්ත්රික් ලේකම්වරුන්, ප්රාදේශීය ලේකම්වරුන්, සියලුම ශාසනාරක්ෂක මණ්ඩලවල මහා සංඝරත්නය මෙන්ම පොලිස්පතිවරයා (IGP) වෙත ද නිල වශයෙන් යොමුකර තිබෙනවා.”
විශේෂයෙන්ම දන්සැල් පමණක් නොව, ආගමික සදාචාරයට මෙන්ම උතුම් වෙසක් උත්සවයේ ගෞරවයට නොගැලපෙන විවිධ පූජාවන් සහ නොහොබිනා ක්රියාකාරකම් රැසක් නියාමනය කර වළක්වා ගැනීමට ද මෙම නව රාජ්ය චක්රලේඛය මඟින් ආරක්ෂක අංශ සහ ප්රාදේශීය නිලධාරීන් වෙත පැහැදිලි උපදෙස් හා නියෝග ලබා දී ඇති බව ද කොමසාරිස්වරයා වැඩිදුරටත් සඳහන් කළේය.
