ශ්රී ලංකාවේ වත්මන් දේශීය මී පැණි නිෂ්පාදනය සිව් ගුණයකින් ඉහළ නැංවීම සඳහා කෘෂිකර්ම දෙපාර්තමේන්තුව විසින් සුවිශේෂී ජාතික සැලසුම් රැසක් සකස් කර ඇති බව කෘෂිකර්ම අධ්යක්ෂ ජනරාල් ආචාර්ය තුෂාර වික්රමාරච්චි මහතා පවසයි. එළඹෙන මැයි 20 වනදාට යෙදෙන ජාත්යන්තර බිඟු දිනය (World Bee Day) නිමිත්තෙන් අද (18) පෙරවරුවේ පේරාදෙණියේ සිට මහනුවර සහස් උයන දක්වා උත්කර්ෂවත් අයුරින් පැවැත්වුණු බිඟු සැමරුම් පාගමනට සක්රියව එක්වෙමින් අධ්යක්ෂ ජනරාල්වරයා මේ බව ප්රකාශ කළේය.
ඒ අනුව, දැනට මෙරට පවතින මෙට්රික් ටොන් 50ක ඉතා සීමිත වාර්ෂික මී පැණි නිෂ්පාදනය, නව තාක්ෂණික ක්රමවේද ඔස්සේ කඩිනමින් මෙට්රික් ටොන් 200ක ඉහළ මට්ටමක් දක්වා වර්ධනය කිරීම දෙපාර්තමේන්තුවේ මූලික අපේක්ෂාව වී තිබේ. මිනිස් දෛනික ආහාර වේලෙන් තුනෙන් එකක්ම (1/3) සෘජුව හෝ වක්රව මී මැස්සන් මත රඳා පවතින බවත්, සමස්ත ලෝක කෘෂිකාර්මික නිෂ්පාදනයෙන් සියයට 35ක්ම (35%) සිදුවන්නේ මී මැස්සන් උපකාරී වන පරාගණ ක්රියාවලිය (Pollination) මඟින් බවත් හෙතෙම මෙහිදී පෙන්වා දුන්නේය.
යම් හෙයකින් ලෝකයෙන් මී මැස්සන් වඳ වීමේ තර්ජනයකට ලක්වුවහොත් සමස්ත ලෝක ආර්ථිකයට ඇමෙරිකානු ඩොලර් බිලියන 500ක අතිදැවැන්ත ආදායමක් අහිමි වී ගෝලීය ආහාර සුරක්ෂිතතාව (Food Security) මුළුමනින්ම බිඳ වැටෙන බව ද ආචාර්ය තුෂාර වික්රමාරච්චි මහතා දැඩිව අවධාරණය කළේය. මේ අතර, 2026 වසරේ ප්රධාන ජාතික බිඟු දින සැමරුම් උත්සවය සහ ප්රදර්ශනය වාරියපොල කෘෂිකර්ම විද්යාලීය මී මැසි සංවර්ධන ඒකක පරිශ්රයේදී ඉතා උත්කර්ෂවත් අයුරින් පැවැත්වීමට සියලු කටයුතු සූදානම් කර ඇති බව ද මෙහිදී අනාවරණය කෙරුණා.
