යුද ජයග්රහණය සඳහා දේශපාලන නායකත්වය ලබාදුන් මහින්ද රාජපක්ෂ මහතාට විශේෂ ගෞරවයක් පුද කරන බව විපක්ෂ නායක සජිත් ප්රේමදාස මහතා පාර්ලිමේන්තුවේදී ප්රකාශ කළේය. එසේම යුද හමුදාපතිවරයා ලෙස නායකත්වය දුන් සරත් ෆොන්සේකා මහතා ඇතුළු ත්රිවිධ හමුදාවටත්, පොලීසිය සහ සිවිල් ආරක්ෂක බලකාය ඇතුළු සමස්ත ආරක්ෂක අංශවලටත් සිය විශේෂ ගෞරවය හිමිවන බව ඔහු වැඩිදුරටත් සඳහන් කළේය.
පාර්ලිමේන්තුවේ පැවැති විවාදයකදී අදහස් දක්වමින් විපක්ෂ නායකවරයා ප්රකාශ කළේ රට බේරා ගැනීම සඳහා දිවි පිදූ රණවිරුවන්ට තමන් ගෞරවනීය උත්තමාචාරය පුද කරන බවයි. ත්රස්තවාදී යුද්ධය හේතුවෙන් තමන්ගේ පියා අහිමි වූ නිසා එම වේදනාව සහ කම්පනය තමන්ට හොඳින්ම වටහා ගත හැකි බවත්, යුද්ධය හේතුවෙන් මව්පියන් අහිමි වූ දරුවන්ගේ සහ රණවිරු පවුල්වල අසීමිත දුක පිළිබඳව තමන්ට අවබෝධයක් ඇති බවත් ඔහු පැවසීය.
එසේම විවිධ ජන කොටස් යුද්ධය නිසා විඳි පීඩාවන් සම්බන්ධයෙන් අදහස් දැක්වූ විපක්ෂ නායකවරයා, එම ගැටලුවලට විසඳුම් ලබා දීම ජිනීවා වැනි ජාත්යන්තර වේදිකාවල නොව අප රට තුළම සිදු විය යුතු බව අවධාරණය කළේය. රටේ ඒකීයභාවය ආරක්ෂා කර ගනිමින් ප්රතිසන්ධාන වැඩපිළිවෙළක් හරහා සියලු ජාතීන් සහ ආගම් අතර සංහිඳියාව වර්ධනය කිරීමෙන් පමණක් රටේ සියලු ගැටලු විසඳිය හැකි බව ඔහු වැඩිදුරටත් සඳහන් කළේය.
