කොළඹ ජාතික කලා භවනයේ (National Art Gallery) සුරක්ෂිතව තිබිය යුතු අතිශය වටිනා පෞරාණික සිතුවම් 42ක් අභිරහස් ලෙස අතුරුදන් වී (අස්ථානගත වී) ඇති බව බුද්ධශාසන, ආගමික හා සංස්කෘතික කටයුතු අමාත්ය හිනිදුම සුනිල් සෙනෙවි මහතා අද (21) පාර්ලිමේන්තුවේදී විශේෂ ප්රකාශයක් කරමින් හෙළිදරව් කළේය. අද පෙරවරුවේ පාර්ලිමේන්තු සභාවාරයේදී මන්ත්රීවරුන් ඇසූ වාචික ප්රශ්නවලට පිළිතුරු දෙමින් අමාත්යවරයා මේ බව නිල වශයෙන් තහවුරු කළේය.
අමාත්යවරයා පෙන්වා දුන්නේ නිල භාණ්ඩ සමීක්ෂණ මණ්ඩලයක් විසින් අවසන් වරට ජාතික කලා භවනයේ චිත්ර හා මූර්ති පිළිබඳ සිදුකළ විශේෂ විගණනයකදී මෙම මහා පරිමාණ අතුරුදන් වීම පිළිබඳ තොරතුරු මුල්වරට අනාවරණය වී ඇති බවයි. කලා භවනයේ ප්රධාන තොග පොතෙහි (Stock Book) නිල වශයෙන් සිතුවම් 281ක් ලියාපදිංචි කර තිබුණ ද, වත්මන් භෞතික පරීක්ෂාවලදී එහි ඉතිරිව ඇත්තේ සිතුවම් 239ක් පමණක් බව හෙළි වී තිබේ. ඒ අනුව අතුරුදන් වී ඇති සිතුවම් 42 කට සිදු වූයේ කුමක්ද, ඒවා කිසියම් පිරිසක් විසින් සොරකම් කර ඇති ද යන්න සෙවීම සඳහා සංස්කෘතික කටයුතු අමාත්යාංශය මඟින් වහාම ක්රියාත්මක වන පරිදි විශේෂ විමර්ශන කමිටුවක් පත් කර ඇති බවත්, වැරදිකරුවන්ට එරෙහිව තරාතිරම නොබලා දැඩි නීතිමය පියවර ගන්නා බවත් අමාත්යවරයා වැඩිදුරටත් අවධාරණය කළේය.
