එළඹෙන වෙසක් උත්සව සමයේදී දන්සල් සංවිධානය කරනු ලබන පිරිස්, පැණිබීම ඇතුළු සිසිල් බීම වර්ග වෙනුවට තේ, කෝපි වැනි උණුසුම් බීම වර්ග පිරිනැමීමට ප්රමුඛතාව ලබාදෙන ලෙස සෞඛ්ය අමාත්යාංශය විශේෂ ඉල්ලීමක් කරයි. ජලයෙන් බෝවන රෝග පැතිරීමේ අවදානම සැලකිල්ලට ගනිමින් මහජන සෞඛ්ය සුරක්ෂිතතාව වෙනුවෙන් මෙම පියවර ගත් බව සෞඛ්ය සේවා අධ්යක්ෂ ජනරාල්, විශේෂඥ වෛද්ය අසේල ගුණවර්ධන මහතා ප්රකාශ කළේය.
දිවයිනේ ඇතැම් ප්රදේශවලින් මේ දිනවල බෝවන රෝග පැතිරයාමේ ප්රවණතාවක් වාර්තා වන බැවින්, අපිරිසිදු ජලය හෝ නිසි ප්රමිතියෙන් තොර අයිස් කැට භාවිතයෙන් සකසන සිසිල් බීම දන්සල් හරහා ලෙඩ රෝග ව්යාප්ත වීමේ වැඩි ඉඩකඩක් පවතින බව සෞඛ්ය බලධාරීන් පෙන්වා දෙයි. මේ හේතුවෙන් සියලුම දන්සල් සංවිධායකයන් තමන්ගේ ප්රදේශයේ බලප්රදේශය භාර සෞඛ්ය වෛද්ය නිලධාරී (MOH) කාර්යාලය සහ මහජන සෞඛ්ය පරීක්ෂකවරුන් (PHI) සමඟ සම්බන්ධ වී උපදෙස් ලබාගනිමින් දන්සල් කටයුතු සැලසුම් කළ යුතු බව සෞඛ්ය අමාත්යාංශය අවධාරණය කරයි.
මේ පිළිබඳව දන්සල් සංවිධායකයන්ට අවශ්ය සම්බන්ධීකරණ සහාය සහ වැඩිදුර තොරතුරු ලබාගැනීම සඳහා සෞඛ්ය අමාත්යාංශය විසින් විශේෂ දුරකථන අංක කිහිපයක් ද හඳුන්වා දී ඇත.
ඒ අනුව කොළඹ මහා නගර සභා (CMC) බලප්රදේශය තුළ දන්සල් සංවිධානය කරන පිරිස්වලට ප්රධාන මහජන සෞඛ්ය පරීක්ෂක ටී.එච්.වී.සී. විතානගේ මහතා (0776697674) සම්බන්ධ කරගත හැකිය. දිවයිනේ සෙසු ප්රදේශ සඳහා මධ්යම ආහාර පාලන ඒකකයේ සහකාර අධ්යක්ෂ කේ.කේ.එල්. ජයලාල් මහතා (0779191010) අමතා උපදෙස් ලබාගත හැකි අතර, අතිරේක සන්නිවේදන සහාය සෞඛ්ය අධ්යාපන නිලධාරී ජනක සුනෙත් බණ්ඩාර මහතා (0714327387) මඟින් ලබාගත හැකි බව ද සෞඛ්ය අමාත්යාංශය වැඩිදුරටත් දැනුම් දෙයි.
