දිවයිනේ විවිධ ප්රදේශවල ඊයේ (27) දිනය තුළ සිදු වූ යතුරුපැදි අනතුරු තුනකින් පුද්ගලයින් තිදෙනෙකු ජීවිතක්ෂයට පත්ව ඇති බව පොලිස් මූලස්ථානය පවසයි. මඩකලපුව, බිංගිරිය සහ පොලොන්නරුව යන පොලිස් වසම්වලින් මෙම මාරක අනතුරු වාර්තා වී තිබේ.
මඩකලපුවේ අනතුර:
මඩකලපුව – තිරුපන්තුර අතුරු මාර්ගයේ, ගුවන් හමුදා කඳවුර ආසන්නයේදී ඊයේ සවස තිරුපන්තුර දෙසට ධාවනය වූ යතුරුපැදියක් පැදිකරුට පාලනය කරගත නොහැකිව මාර්ගයෙන් ඉවතට පැන කලපුවට පෙරළී තිබේ. අනතුරින් බරපතල තුවාල ලැබූ 20 හැවිරිදි යතුරුපැදිකරු මඩකලපුව රෝහලට ඇතුළත් කිරීමෙන් පසු මියගොස් ඇත. මඩකලපුව පොලිසිය මේ පිළිබඳ වැඩිදුර විමර්ශන පවත්වයි.
බිංගිරියේ අනතුර:
බිංගිරිය පොලිස් වසමේ අළුපොත – අකරවත්ත මාර්ගයේ, හමන්නාපහුව ප්රාථමික විද්යාලය ආසන්නයේදී දළුපොත දෙසට ධාවනය වූ යතුරුපැදියක් පාලනය කරගත නොහැකිව, ප්රතිවිරුද්ධ දෙසින් පැමිණි වෙනත් යතුරුපැදියක මුහුණට මුහුණ ගැටී අනතුරට ලක්විය. ඊයේ දහවල් සිදු වූ මෙම අනතුරින් පැදිකරු සහ පසුපැදිකරු කුලියාපිටිය රෝහලට ඇතුළත් කර ඇති අතර, එහිදී නාගොල්ලාගොඩ පදිංචි 76 හැවිරිදි පැදිකරු ජීවිතක්ෂයට පත්ව තිබේ. බිංගිරිය පොලිසිය මේ සම්බන්ධයෙන් විමර්ශන සිදු කරයි.
පොලොන්නරුවේ අනතුර:
මේ අතර ඊයේ සවස පොලොන්නරුව පොලිස් වසමේ දිවුලාන අතුරු මාර්ගයේදී ද දිවුලාන දෙසට ධාවනය වූ යතුරුපැදියක් පැදිකරුට පාලනය කරගත නොහැකිව ප්රතිවිරුද්ධ දෙසින් පැමිණි යතුරුපැදියක ගැටීමෙන් අනතුරක් සිදු විය. මෙම යතුරුපැදි දෙක එකිනෙක ගැටීමෙන් සිදුවූ අනතුරින් ඕනෑගම ප්රදේශයේ පදිංචි 17 හැවිරිදි වියේ පසුවූ තරුණයෙකු ජීවිතක්ෂයට පත්ව ඇත. පොලොන්නරුව පොලිසිය සිද්ධිය සම්බන්ධයෙන් වැඩිදුර පරීක්ෂණ පවත්වයි.
