අනුරාධපුර ගුවන්තොටුපළ මාර්ගයේදී සිදුවූ රිය අනතුරකින්, බරපතල තුවාල ලබා ප්රතිකාර ලබමින් සිටි ගැබිණි ග්රාම නිලධාරීනියක් ඊයේ (27) අවාසනාවන්ත ලෙස ජීවිතක්ෂයට පත්ව ඇති බව කවරක්කුලම පොලිසිය පවසයි. මෙලෙස ජීවිතක්ෂයට පත්ව ඇත්තේ අනුරාධපුර ප්රදේශයේ පදිංචිව සිටි, මධ්යම නුවරගම් පළාත් ප්රාදේශීය ලේකම් කාර්යාලයට අනුයුක්තව මහබුලංකුලම 283 තුලානයේ ග්රාම නිලධාරීවරිය ලෙස රාජකාරී කළ ආර්. එම්. භාග්යා නිළුපුලී වඩුගොඩපිටිය නැමැති 32 හැවිරිදි කාන්තාවකි.
ඉකුත් 18 වැනිදා මෙම කාන්තාව තවත් කාන්තාවක සමඟ යතුරුපැදියකින් කවරක්කුලම දෙස සිට අනුරාධපුර දෙසට ගමන් කරමින් සිටියදී, පිටුපසින් පැමිණි සැහැල්ලු ලොරි රථයක් යතුරුපැදියේ ගැටීමෙන් මෙම අනතුර සිදුව තිබුණි. අනතුරින් බරපතල තුවාල ලැබූ දෙදෙනාම අනුරාධපුර ශික්ෂණ රෝහලට ඇතුළත් කර ඇති අතර, එහි දැඩි සත්කාර ඒකකයේ ප්රතිකාර ලබමින් සිටියදී ග්රාම නිලධාරිනිය මෙලෙස ජීවිතක්ෂයට පත්ව තිබේ. ඇය ප්රතිකාර ලබමින් සිටින අතරතුරදී ඇගේ කුස තුළ සිටි කුඩා දරුවාද ජීවිතක්ෂයට පත්ව ඇති බව රෝහල් ප්රකාශකයකු සඳහන් කළේය.
අනතුර සම්බන්ධයෙන් සැහැල්ලු ලොරි රථය පදවා ඇති කුරුන්දන්කුලම ප්රදේශයේ පදිංචි 27 හැවිරිදි රියදුරා පොලිසිය විසින් අත්අඩංගුවට ගෙන තිබේ. සිද්ධිය සම්බන්ධයෙන් කවරක්කුලම පොලිසියේ රථවාහන අංශයේ නිලධාරීන් කණ්ඩායමක් වැඩිදුර විමර්ශන පවත්වයි.
