ජෝර්ජියාවේ ශ්රී ලංකා තානාපතිවරයා වශයෙන් පත්කළ නිලූක කදුරුගමුව මහතා, ජෝර්ජියානු ජනාධිපති මිකෙල් කවෙලෂ්විලි මහතා වෙත සිය අක්තපත්ර පිළිගන්වා තිබේ. තුර්කියේ අන්කාරා නුවර සිට නේවාසිකව කටයුතු කරන තානාපතිවරයා ටිබිලිසි නුවර පැවැති නිල උත්සවයකදී මෙම අක්තපත්ර පිරිනමා ඇති බව විදේශ කටයුතු අමාත්යාංශය සඳහන් කළේය.
අක්තපත්ර පිරිනැමීමෙන් අනතුරුව ජනාධිපතිවරයා හමුවූ තානාපතිවරයා, ශ්රී ලංකා ජනාධිපති අනුර කුමාර දිසානායක මහතාගේ සුබපැතුම් ජෝර්ජියානු ජනාධිපතිවරයා, රජය සහ ජනතාව වෙත පිරිනමන ලදී. එහිදී දෙරට අතර පවතින දිගුකාලීන මිත්රත්වය සහ සහයෝගිතාව තවදුරටත් ශක්තිමත් කිරීමට ශ්රී ලංකාව දක්වන කැපවීම ද ඔහු තහවුරු කළේය. මෙම නිල සංචාරයේදී තානාපති කදුරුගමුව මහතා ජෝර්ජියානු නියෝජ්ය අගමැති සහ විදේශ කටයුතු ඇමැති මාකා බොචොරිෂ්විලි මහත්මිය සහ නියෝජ්ය විදේශ අමාත්ය ජෝර්ජ් සුරාබාෂ්විලි මහතා ඇතුළු ජ්යෙෂ්ඨ රාජ්ය නිලධාරීන් රැසක් ද හමුවී සාකච්ඡා පවත්වා තිබේ.
මෙම සාකච්ඡාවලදී දේශපාලන සහයෝගිතාව, වෙළෙඳ, ආයෝජන, සංචාරක, අධ්යාපනය සහ සංස්කෘතික හුවමාරු යන ක්ෂේත්ර පිළිබඳව පුළුල් ලෙස අවධානය යොමු විය. විශේෂයෙන්ම ටිබිලිසි රාජ්ය වෛද්ය විශ්වවිද්යාලය ඇතුළුව ජෝර්ජියාවේ උසස් අධ්යාපනය හදාරන ශ්රී ලාංකික සිසුන් සංඛ්යාව ඉහළ යෑම පිළිබඳව මෙහිදී විශේෂ අවධානයක් යොමුවූ අතර, තානාපතිවරයා එහි සිටින ශ්රී ලාංකික සිසුන් හමුවී ඔවුන්ගේ සුභසාධන කටයුතු පිළිබඳව ද සොයා බලා ඇත. මෙම නිල සංචාරය සඳහා අන්කාරා හි ශ්රී ලංකා තානාපති කාර්යාලයේ අමාත්ය නිලූෂා දිල්මිණි මහත්මිය ද සහභාගී වූවාය.
