කොංගෝ ප්රජාතන්ත්රවාදී සමූහාණ්ඩුවේ (DRC) සීඝ්රයෙන් ව්යාප්ත වන නවතම ඉබෝලා වසංගතය පාලනය කිරීම සඳහා ප්රජා සහභාගීත්වය ඉතා වැදගත් බව ලෝක සෞඛ්ය සංවිධානයේ (WHO) අධ්යක්ෂ ජනරාල් ටෙඩ්රොස් අද්හැනොම් ගෙබ්රෙයෙසස් මහතා පවසයි.
වසංගතයේ කේන්ද්රස්ථානයක් වන ඉටුරි පළාතේ බුනියා වෙත පැමිණි ඔහු මාධ්ය වෙත අදහස් දක්වමින් කියා සිටියේ, පවතින ගැටලු සහ විසඳුම් පිළිබඳව ප්රජාවට හොඳ අවබෝධයක් ඇති බවයි. රජයේ නායකත්වය යටතේ ජාත්යන්තර ප්රජාව සහයෝගය ලබා දුන්නද, වසංගතය පාලනය කිරීමේදී ප්රජා මූලික මැදිහත්වීම අත්යවශ්ය බව ඔහු අවධාරණය කළේය.
මේ අතර, කොංගෝ බලධාරීන් සඳහන් කරන්නේ පසුගිය සිකුරාදා වන විට ඉබෝලා රෝගය වැළඳී ඇතැයි සැකකෙරෙන පුද්ගලයන් 1,028 දෙනෙකු වාර්තා වී ඇති බවයි. වසංගතය පාලනය සඳහා අවශ්ය අරමුදල්වලින් ලැබී ඇත්තේ තුනෙන් එකක් පමණක් බවත්, වැඩිදුර ජාත්යන්තර සහයෝගය අත්යවශ්ය බවත් ටෙඩ්රොස් මහතා කින්ෂාසා නුවරදී පැවසීය.
1976 වසරෙන් පසු වාර්තා වූ 17 වැනි ඉබෝලා වසංගතය මෙය වන අතර, එය පෙර නොවූ විරූ වේගයකින් පැතිර යන බව ‘මෙඩෙසින් සෑන්ස් ෆ්රොන්ටියර්ස්’ (MSF) වෛද්ය ආධාර සංවිධානය අනතුරු අඟවයි. ප්රමාණවත් තරම් විශේෂඥ වෛද්ය ආයතන සහ සහයෝගය මේ වන විට ලැබී නොමැති බවද එම සංවිධානය පෙන්වා දෙයි.
