මැදපෙරදිග කලාපය තුළ යළිත් වරක් ප්රචණ්ඩකාරී තත්ත්වයන් සහ ගැටුම් උද්රිගත වීම පිළිබඳව තමන් දැඩි සේ කැලඹීමට පත්ව ඇති බව එක්සත් ජාතීන්ගේ සංවිධානයේ (UN) මහලේකම් අන්තෝනියෝ ගුටරේස් (Antonio Guterres) මහතා අද (09) ප්රකාශ කළේය. එමෙන්ම ගාසා තීරය වෙත මානුෂීය ආධාර රැගත් ට්රක් රථ ඇතුළු කිරීම සඳහා වසා දමා ඇති සියලුම දේශසීමා කඩිනමින් විවෘත කරන ලෙස ඔහු ඉශ්රායලයෙන් හදිසි ඉල්ලීමක් ද කළේය.
සිය නිල ‘X’ ගිණුමේ සටහනක් තබමින් මහලේකම්වරයා අවධාරණය කළේ, සියලුම ආකාරයේ ප්රහාරයන් වහාම නතර කළ යුතු අතර ලෙබනනය, ඉරානය සහ ගාසා තීරය තුළ ප්රකාශයට පත් කර ඇති සටන් විරාම ගිවිසුම්වලට සියලු පාර්ශවයන් පූර්ණ ලෙස ගරු කළ යුතු බවයි.
පසුගිය අප්රේල් මාසයේ පැවැති සටන් විරාමයෙන් පසුව ඉශ්රායලය විසින් ඊයේ (08) පළමු වතාවට ඉරාන ඉලක්ක වෙත ගුවන් ප්රහාර එල්ල කරන ලදී. ලෙබනනයේ බීරූට් අගනුවරට ඉශ්රායලය එල්ල කළ ප්රහාරවලට පළිගැනීමක් ලෙස ඉරානය විසින් ඉශ්රායලය දෙසට මිසයිල ප්රහාර එල්ල කිරීම මීට හේතුව බව ටෙහෙරානය ප්රකාශ කර තිබුණි. කෙසේ වෙතත්, ඇමෙරිකානු ජනාධිපති ඩොනල්ඩ් ට්රම්ප් විසින් ප්රහාර වහාම නතර කරන ලෙස කරන ලද දැනුම්දීමකින් පසුව, දෙපාර්ශවයම ඊයේ පස්වරුවේ තාවකාලිකව ප්රහාර නැවැත්වීමට එකඟ වුවද, නැවත ප්රහාර ඇරඹීමේ අවකාශය විවෘතව තබා ඇත. මෙම ඍජු ගැටුම්කාරී තත්ත්වය හේතුවෙන් ඉරානය සහ ඉශ්රායලය අතර මාස 3කට වැඩි කාලයක් තිස්සේ පවතින දරුණු යුද්ධය නිමා කිරීම සඳහා වොෂින්ටනය ගන්නා සාමකාමී උත්සාහයන් ද දැඩි අවදානමකට ලක්ව තිබේ.
ගාසා තීරයේ පවතින බරපතළ මානුෂීය අර්බුදය පිළිබඳව ද සිය දැඩි කනස්සල්ල පළ කළ මහලේකම් ගුටරේස් මහතා, පීඩාවට පත් සිවිල් වැසියන් වෙනුවෙන් අත්යවශ්ය ආහාර සහ වෛද්ය ආධාර ඉතා කඩිනමින්, ආරක්ෂිතව සහ කිසිදු බාධාවකින් තොරව ගාසා තීරය පුරා බෙදාහැරීම සහතික කිරීම සඳහා වසා දමා ඇති සියලුම මායිම් දොරටු වහාම විවෘත කළ යුතු බව රජයට යළිත් මතක් කර දුන්නේය.
