බලය පවත්වාගෙන යෑම සහ බලය ලබාගැනීම සඳහා රාජපක්ෂවරුන් විසින් පාස්කු ප්රහාරය සිදු කළ බව ඕනෑම අයෙකුට තේරුම් ගත හැකි වුවත්, එය විද්යාත්මක කරුණු මඟින් නීත්යානුකූලව ඔප්පු කළ යුතු බව සභානායක, ප්රවාහන, මහාමාර්ග සහ නාගරික සංවර්ධන ඇමැති බිමල් රත්නායක මහතා පැවසීය.
ලෝක ඉතිහාසයේ දේශපාලන බලය රඳවා ගැනීම සඳහා මෙවැනි ත්රස්තවාදී උපක්රම (Reichstag fire වැනි සිදුවීම්) භාවිත කළ උදාහරණ ඇති බව පෙන්වා දුන් ඇමැතිවරයා, ගෝඨාභය රාජපක්ෂ මහතා බලයට ගෙන ඒම සඳහා මෙම ප්රහාරය සැලසුම් කළ බවට පැහැදිලි සාක්ෂි පවතින බව සඳහන් කළේය. අප්රේල් 21 වැනිදා පාස්කු බෝම්බ ප්රහාරය සිදු වී, අප්රේල් 23 වැනිදා වන විට ගෝඨාභය රාජපක්ෂ මහතා ජනාධිපතිවරණයට ඉදිරිපත් වන බව ප්රකාශ කිරීම තුළින්ම එහි දේශපාලන පසුබිම පැහැදිලි වන බව හෙතෙම කීය. මෙම ප්රහාරය හේතුවෙන් රටේ ආර්ථිකය මුළුමනින්ම කඩා වැටුණු අතර, සමස්ත මුස්ලිම් ප්රජාවම ත්රස්තවාදීන් ලේබලයට කොටු කිරීමට කටයුතු කෙරුණු බව ද ඇමැතිවරයා පෙන්වා දුන්නේය.
හිටපු බුද්ධි අංශ ප්රධානී සුරේෂ් සලේ මෙම සිදුවීමට සම්බන්ධ බවට ජෙනරාල් සරත් ෆොන්සේකා මහතා ද ප්රකාශ කර ඇති බව සිහිපත් කළ බිමල් රත්නායක මහතා, මේ වන විට සලේ නමැත්තා හදිසියේ රෝගාතුර වී විශේෂඥ වෛද්යවරුන් හත් අට දෙනෙකු හමුවීමට කටයුතු කරමින් සිටින බව ද අනාවරණය කළේය. පසුගිය කාලයේ රාජපක්ෂලා අල්ලස් කොමිසමට රැගෙන ගියහොත් ගිනි තබා ගන්නා බවට තර්ජනය කළ ද, අවසානයේ ගිනිකූරක්වත් ගසා නොගත් බව පැවසූ ඇමැතිවරයා, හිටපු ජනාධිපතිවරුන් හෝ හිටපු ආරක්ෂක නිලධාරීන් වුවද වරදට සම්බන්ධ නම් ඔවුන්ට එරෙහිව තරාතිරම නොබලා නීතිය ක්රියාත්මක කරන බව අවධාරණය කළේය.
මෙවැනි දූෂිතයන්ගේ බොරු තර්ජන ගර්ජනවලට වත්මන් ආණ්ඩුව කිසිසේත් බිය නොවන බවත්, කොන්ද කෙළින් තබාගෙන වැඩ කරන රජයේ නිලධාරීන්ට රජය නිරන්තරයෙන් ගරු කරන බවත් ඇමැති බිමල් රත්නායක මහතා වැඩිදුරටත් කියා සිටියේය.
