2026 පාපන්දු ලෝක කුසලාන තරඟාවලියේ සමාරම්භක තරඟයේදීම අන්තර්ජාලය කැළඹූ පළමු ‘මීම්’ (Meme) එක බිහිවී තිබේ. සත්කාරක මෙක්සිකෝව සහ දකුණු අප්රිකාව අතර මෙක්සිකෝ සිටි හි ඇස්ටෙකා ක්රීඩාංගණයේ (Azteca Stadium) පැවැති මෙම සමාරම්භක තරඟයෙන් මෙක්සිකෝව 2-0ක පහසු ජයක් වාර්තා කළේය.
කෙසේ වෙතත්, මෙක්සිකෝව තරඟයෙන් ලකුණු 3ක් ලබාගන්නා විට, දකුණු අප්රිකාව අන්තර්ජාලයේ ‘මීම්’ තරඟයෙන් ජයග්රහණය කිරීමට සමත් විය. ඊට හේතුව තරඟය අතරතුර ක්රීඩකයින්ට රතු කාඩ්පත් නිකුත් කිරීමේ සිදුවීමක් සමාජ මාධ්ය තුළ දැඩි කතාබහකට ලක්වීමයි. මෙම තරඟයේදී ගෝල සංඛ්යාවට වඩා වැඩි රතු කාඩ්පත් සංඛ්යාවක් වාර්තා වූ අතර, එහිදී බ්රසීල ජාතික විනිසුරු විල්ටන් සැම්පායෝ (Wilton Sampaio) විසින් ක්රීඩකයින් තිදෙනෙකුටම රතු කාඩ්පත් නිකුත් කර ක්රීඩා පිටියෙන් ඉවත් කිරීමට පියවර ගත්තේය.
එහිදී ඇතිවූ මතභේදාත්මක රතු කාඩ්පත් තීරණයක් සම්බන්ධයෙන් VAR (Video Assistant Referee) තාක්ෂණය ඔස්සේ පරීක්ෂා කර, විනිසුරුවරයා විසින් එය ශබ්ද විකාශන යන්ත්ර හරහා ඉංග්රීසි භාෂාවෙන් පැහැදිලි කිරීමට උත්සාහ කළේය. එහෙත් ඔහු ඉතා අපැහැදිලි සහ වෙව්ලන සුළු ඉංග්රීසි බසින් (shaky English) එම තීරණය ප්රකාශ කිරීම නිසා ක්රීඩකයින් මෙන්ම ප්රේක්ෂකයින් ද ඔහු පැවසූ දේ කුමක්දැයි වටහාගත නොහැකිව මවිතයට පත් විය. විනිසුරුවරයාගේ මෙම අපූර්ව හැසිරීම සහ ක්රීඩකයින්ගේ මුහුණේ ඉරියව් මේ වන විට ලෝක කුසලානයේ පළමු මීම් එක බවට පත්වෙමින් අන්තර්ජාලය පුරා වේගයෙන් ප්රචාරය වෙමින් පවතී.
