ශ්රී ලංකාව සහ ප්රංශය අතර සාගරික සහයෝගිතාව ශක්තිමත් කිරීම සඳහා දැක්වූ සුවිශේෂී දායකත්වය අගයමින් Orange Marine සමාගමේ ප්රධාන විධායක නිලධාරී ඩිඩියර් ඩිලර්ඩ් (Didier Dillard) මහතාට උපහාර පිදීමේ විශේෂ උත්සවයක් පැරිසියේ පිහිටි ශ්රී ලංකා තානාපති කාර්යාලයේදී පවත්වා තිබේ. පැරිසියේ ශ්රී ලංකා තානාපති කාර්යාලයේ වැඩබලන තානාපතිනි සංජු දසනායක මහත්මිය විසින් මෙම උත්සවය සංවිධානය කර තිබූ අතර, එහිදී ශ්රී ලංකාව සහ ප්රංශය අතර වර්ධනය වන සාගරික හවුල්කාරිත්වය සහ Orange Marine සමාගම හා කොළඹ ඩොක්යාර්ඩ් (Colombo Dockyard PLC) ආයතනය අතර පවතින කාර්මික සහයෝගිතාවයේ වැදගත්කම මැනවින් අවධාරණය කෙරිණි.
මෙම අවස්ථාවට අපනයන සංවර්ධන මණ්ඩලයේ (EDB) සභාපති මංගල විජේසිංහ සහ ශ්රී ලංකා සාගරික කර්මාන්ත මණ්ඩලයේ (CMISL) සභාපති කෞශාල් රාජපක්ෂ මහත්වරුන් ඇතුළු නියෝජිත පිරිසක් සෘජුව සහ මාර්ගගත (Online) ක්රමය ඔස්සේ සම්බන්ධ වී සිටියහ. එහිදී අදහස් දැක්වූ අපනයන සංවර්ධන මණ්ඩලයේ සභාපතිවරයා, ශ්රී ලංකාවේ නැව් තැනීමේ හැකියාව පිළිබඳව Orange Marine සමාගම තැබූ විශ්වාසය බෙහෙවින් අගය කළේය. එමෙන්ම, 2027 ජනවාරි 14 සිට 17 දක්වා කොළඹදී පැවැත්වීමට නියමිත ‘Sri Lanka Expo 2027’ ප්රදර්ශනය සඳහා සහභාගී වන ලෙස ද ඔහු එම සමාගමට නිල වශයෙන් ආරාධනා කර තිබේ.
විදේශ කටයුතු අමාත්යාංශය සඳහන් කරන පරිදි, කොළඹ ඩොක්යාර්ඩ් ආයතනය විසින් Orange Marine සමාගම වෙනුවෙන් 2023 වසරේදී සාර්ථකව නිම කරන ලද ‘Sophie Germain’ කේබල් එළන නෞකාව (Cable-laying vessel) පිළිබඳ විශේෂ වීඩියෝ දර්ශනයක් ද මෙහිදී ඉදිරිපත් කර ඇත. ශ්රී ලංකාවේ නැව් තැනීමේ සහ සාගරික ඉංජිනේරු ක්ෂේත්රයේ ජාත්යන්තර කීර්තිය ඉහළ නැංවීමට මෙවැනි ප්රමුඛ පෙළේ හවුල්කාරිත්වයන් බෙහෙවින් දායක වන බව ශ්රී ලංකා සාගරික කර්මාන්ත මණ්ඩලයේ සභාපති කෞශාල් රාජපක්ෂ මහතා මෙහිදී වැඩිදුරටත් ප්රකාශ කළේය.
