මැදපෙරදිග යුදමය තත්ත්වය සමනය වෙමින් පවතින බවට ජාත්යන්තර මාධ්ය වාර්තා කර ඇති බැවින්, එළඹෙන ජූලි මාසයේදී මෙරට ඉන්ධන මිල වහාම පහත හෙළා පීඩාවට පත්ව සිටින ජනතාවට සහන සැලසීමට රජය කටයුතු කළ යුතු බව සමගි ජන බලවේගයේ (SJB) ජාතික සංවිධායක තිස්ස අත්තනායක මහතා පවසයි.
සමගි ජන බලවේග ප්රධාන කාර්යාලයේ පැවැති මාධ්ය හමුවකට එක්වෙමින් ඒ මහතා කියා සිටියේ, ජාත්යන්තර මූල්ය අරමුදල (IMF) විසින් නිකුත් කර ඇති නවතම සමාලෝචන වාර්තාවට අනුව ශ්රී ලංකාවේ විදේශ විනිමය සංචිත බරපතළ ලෙස බිඳ වැටී ඇති බවයි. මූල්ය අරමුදලේ ඉලක්කයන්ට අනුව මෙරට පැවතිය යුතු සංචිත ප්රමාණය ඩොලර් මිලියන 8.6ක් වුවද, දැනට පවතින්නේ ඩොලර් මිලියන 6.8ක සංචිතයක් පමණක් බවත්, එය බලාපොරොත්තු වූ අගයට වඩා ඩොලර් මිලියන 1.8ක විශාල පසුබෑමක් බවත් ඔහු පෙන්වා දුන්නේය.
මෙවැනි පසුබිමක 2028 වසරේදී මෙරට විදේශ ණය පියවීම ආරම්භ කරන විට තබා ගත යුතු ඩොලර් මිලියන 14ක සංචිත ඉලක්කය සපුරා ගැනීමට හෝ රටේ ණය තිරසරභාවය ආරක්ෂා කර ගැනීමට ආණ්ඩුවට කිසිදු උපායමාර්ගික සැලැස්මක් නොමැති බවට හෙතෙම චෝදනා කළේය. වත්මන් ගිවිසුමේ කොන්දේසි 2028 ඉලක්ක සපුරා ගැනීමට ප්රායෝගික නොවන බැවින්, ජාත්යන්තර මූල්ය අරමුදල සමඟ ඇති කරගෙන තිබෙන එකඟතා නැවත සලකා බලා රටට ඔරොත්තු දෙන නව ගිවිසුමකට එළැඹිය යුතු බව විපක්ෂ නායක සජිත් ප්රේමදාස මහතා දිගින් දිගටම කළ ප්රකාශයන් මෙහිදී වඩාත් තහවුරු වන බවද තිස්ස අත්තනායක මහතා වැඩිදුරටත් අවධාරණය කළේය.
