මෙරට මහජන මුදල් වංචා කළ දූෂිතයන් සහ හොරුන් නීතියේ රැහැනට හසුවී සිරගත වන වසරක් බවට ඉදිරි වසර පත්වන බව නියෝජ්ය අමාත්ය ටී.බී. සරත් මහතා පවසනවා. ඔහු අවධාරණය කරන්නේ පසුගිය කාලයේ සිදුවූ මහා පරිමාණ මූල්ය වංචා සම්බන්ධයෙන් නීතිමය පියවර ගැනීම මේ වන විටත් ආරම්භ කර ඇති බවයි. විශේෂයෙන්ම, ජනාධිපති ලේකම්වරයකු ලෙස කටයුතු කරමින් වැටුප් දෙකක් ලබාගැනීම සහ ජනාධිපති අරමුදලෙන් රුපියල් ලක්ෂ 60කට අධික මුදලක් අවභාවිත කිරීම වැනි බරපතළ වංචා ගැන කරුණු පැහැදිලි කළ අමාත්යවරයා, රටේ ජනතාවගේ සල්ලි මේ වගේ හොරකම් කළ අයට හිමිවිය යුත්තේ හිරගෙදර බව දැඩිව ප්රකාශ කළා.
මෙම අත්අඩංගුවට ගැනීම් කිසිසේත්ම පුද්ගලික පළිගැනීම් නොවන අතර, ඒ සියල්ල නීත්යානුකූලව නීති රාමුව තුළ සිදුවන ක්රියාවලියක් බවයි ඔහු පෙන්වා දෙන්නේ. දැනට ඇප මත සිටින පුද්ගලයන් සම්බන්ධයෙන් අදහස් දක්වමින් අමාත්යවරයා කියා සිටියේ, නඩු අසා අවසන් වනතුරු ඇප ලබාදීම සාමාන්ය ක්රියාවලියක් වුවද, දැන් අලුතින් අධිකරණ පිහිටුවා නඩු විභාග කිරීම වේගවත් කර ඇති නිසා දූෂිතයන්ට නීතියෙන් ගැලවීමට නොහැකි වනු ඇති බවයි.
වර්තමානයේ ආණ්ඩුවට එරෙහිව දූෂණ චෝදනා නඟන පිරිස් විවේචනය කළ අමාත්යවරයා, මීට පෙර හොරකම්වලට සම්බන්ධ වූ පිරිස් අද වෙනත් අය සමඟ එකතු වී ආණ්ඩුව හොරකම් කරනවා යැයි කෑගසන්නේ තමන් කළ වංචා වසා ගැනීමට බව ද වැඩිදුරටත් ප්රකාශ කර සිටියා.
