වත්මන් වී මිල අර්බුදය සම්බන්ධයෙන් අදහස් දක්වමින් ප්රකට සහල් ව්යාපාරික ඩඩ්ලි සිරිසේන මහතා අවධාරණය කරන්නේ, ගොවීන්ට සාර්ථකව වගා කටයුතු කරගෙන යාමට නම් රජය විසින් නාඩු වී කිලෝවක් සඳහා රුපියල් 150ක සහතික මිලක් ලබා දිය යුතු බවයි. එමෙන්ම වී වර්ග අතර පවතින මිල පරතරය නිසි පරිදි කළමනාකරණය නොකිරීම හේතුවෙන් රටේ සහල් නිෂ්පාදනය බරපතළ ගැටලුවකට මුහුණ දී ඇති බව පෙන්වා දෙන ඒ මහතා, සම්බා සහ කීරි සම්බා වී වර්ග සඳහා නාඩු වී මිලට වඩා අවම වශයෙන් රුපියල් 10ක මිල වෙනසක් (වැඩි වීමක්) පැවතිය යුතු බව ද ප්රකාශ කරනවා. දැනට පවතින රුපියල් 5ක පමණ සුළු මිල වෙනස නිසා ගොවීන් සම්බා වගාවෙන් ඉවත් වී නාඩු වගාවට පමණක් යොමු වෙමින් පවතින බවත්, එමඟින් වෙළඳපොළේ එක් සහල් වර්ගයක් පමණක් අතිරික්ත වීමේ අවදානමක් ඇති බවත් ඔහු සඳහන් කළා.
වී මිල ඉහළ දැමීම සහ සහල් මිල අතර පවතින සෘජු සම්බන්ධතාවය පෙන්වා දෙමින් ඔහු කියා සිටියේ, “හෙට වී මිල වැඩි කළොත් අනිද්දා සහල් මිල වැඩි වෙනවා” යනුවෙනි. මේ නිසා වී මිල සම්බන්ධයෙන් තීරණ ගැනීමේදී පක්ෂ-විපක්ෂ භේදයකින් තොරව සියලු දේශපාලනඥයන් පොදු එකඟතාවයකට පැමිණිය යුතු අතර, එසේ නොමැති වුවහොත් වී සහ සහල් මිල සැමදා දේශපාලන අවියක් ලෙස පමණක් භාවිත වනු ඇති බවයි ඔහු පවසන්නේ. වසර ගණනාවක සිට පවතින මෙම ගැටලුව විසඳීමට කෘෂිකර්ම අමාත්යාංශය, නිලධාරීන්, ගොවීන් සහ ව්යාපාරිකයන් එක්ව සාකච්ඡා කර ස්ථිර තීන්දුවක් ගත යුතු බවත්, තමන් ව්යාපාරිකයෙකු ලෙස උපරිම මිලකට වී මිලදී ගැනීමට කටයුතු කළ ද සමස්ත රටේම වී ප්රමාණය තනිව මිලදී ගෙන පවත්වාගෙන යාම ප්රායෝගික නොවන බවත් ඩඩ්ලි සිරිසේන මහතා වැඩිදුරටත් ප්රකාශ කර සිටිනවා.
