දිට්වා සුළි කුණාටුවෙන් විපතට පත් ජනතාවට ස්ථාවර හෙටක් උදා කරදීමේ අරමුණින් නිල ඉඩම් හිමිකම් ප්රදානය කිරීම සහ නිවාස ඉදිකිරීම සඳහා චෙක්පත් ලබා දීම උඩුදුම්බර බටුමුල්ල විද්යාලයේදී කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතාගේ ප්රධානත්වයෙන් සිදු කෙරිණි.
මෙම අවස්ථාවේදී වන සංරක්ෂණ දෙපාර්තමේන්තුවට අයත් තේක්කවත්ත කොටසෙන් අක්කර 30ක් ප්රතිලාභීන් 114 දෙනෙකු වෙත පවරා දුන් අතර, නිවාස ඉදිකර ගැනීම සඳහා රුපියල් ලක්ෂ 50ක මුදලක් හිමිවන පරිදි, එහි පළමු අදියර ලෙස රුපියල් ලක්ෂ 20 බැගින් වූ චෙක්පත් ප්රතිලාභීන්ට ප්රදානය කරන ලදී. මෙතරම් විශාල පිරිසකට ආපදා අවස්ථාවකදී රජයකින් මෙවැනි මුදල් ප්රතිපාදන ලබා දුන් පළමු අවස්ථාව මෙය බව ජනතාව පෙන්වා දුන්හ.
මෙම අවස්ථාවට එක්වෙමින් අමාත්යවරයා දැක්වූ අදහස්:
මාධ්යවලට මේ වැනි ආණ්ඩු මීට පෙර හමු වී නැත. උදේ සිට රෑ වන තුරු ඇතැම් මාධ්ය ආණ්ඩුව සම්බන්ධයෙන් පවසන්නේ සම්පූර්ණයෙන්ම අසත්ය තොරතුරුය. රටක ප්රශ්න තිබිය හැකියි, ප්රශ්න නැති රටක් ලෝකයේ නැත. දිට්වා සිද්ධියෙන් පසු ජනාධිපතිවරයා සහ කැබිනට් මණ්ඩලය අවධානය යොමු කළේ විපතට පත් වූවන්ට හැකි උපරිම සහන ලබා දීමටයි. දිස්ත්රික් ලේකම් කාර්යාලවල මුදල් ප්රතිපාදන තිබුණද, ඒවා නීතිමය චක්රලේඛවලට අනුව නිසි ලෙස ක්රියාත්මක කළ යුතුය. මුදල් පිළිබඳ කිසිදු ගැටලුවක් නැත. ආපදාවට පත් වූවන්ට තිබූ ජීවිතයට වඩා යහපත් ජීවිතයක් ලබා දීම රජයේ ප්රතිපත්තිමය තීරණයයි.
මිනිසා ඉදිරියට විසඳිය නොහැකි කිසිදු ප්රශ්නයක් නොඑන බව කාල් මාක්ස් දාර්ශනිකයා පවසා ඇත. එනිසා කිසිදු අසුබවාදී අදහසක් ඇති කර නොගත යුතුය. අතීතයේ පාර්ලිමේන්තු මන්ත්රීවරු මුලින්ම ලබා ගත්තේ වාහන බලපත්රයයි. එහෙත් අපි උඩට බෙදාගෙන නැත. රටේ භාණ්ඩාගාරයට එකතු වන ආදායම ජනතාවටම ලබා දීමට අපි කටයුතු කරමින් සිටිමු. රජය බලයට පත් වූ වහාම රාජ්ය නිලධාරීන්ගේ වැටුප් වැඩි කළ අතර, ගොවි ජනතාවගේ පොහොර සහනාධාරය රුපියල් 30,000 සිට 60,000 දක්වා දෙගුණ කළෙමු.
ජීවිතය දෙස සුබවාදීව බැලිය යුතුය. අලංකාර හීන දැක ඒවා සාර්ථක කර ගැනීමට කැපවිය යුතුය. ආණ්ඩුව, රාජ්ය යාන්ත්රණය සහ ජනතාව එකම අරමුණක් වෙනුවෙන් එක මිටකට එක් වුවහොත් පමණක් අපේක්ෂිත ඉලක්ක සම්පූර්ණ කරගත හැකිය.
