SLT-MOBITEL ආයතනික පවුලේ එකමුතුකම, කණ්ඩායම් හැඟීම සහ ක්‍රීඩාශීලීත්වය ප්‍රවර්ධනය කිරීමේ අරමුණින් සංවිධානය කෙරෙන ‘SLT-MOBITEL Games 2026’ ක්‍රීඩා උළෙලේ ප්‍රධාන අංගයක් ලෙස මලල ක්‍රීඩා ශූරතාවලිය පසුගිය ජූනි 20 වන දින කොළඹ සුගතදාස ක්‍රීඩාංගණයේදී ඉතා උත්කර්ෂවත් ලෙස පැවැත්විණි.
ආයතනයේ සමස්ත කාර්ය මණ්ඩලයේ සහභාගීත්වයෙන් පැවැති මෙම මලල ක්‍රීඩා උළෙල, හුදෙක් ක්‍රීඩාවකට පමණක් සීමා නොවී, ආයතනික විශිෂ්ටත්වය සහ එකමුතුකම සවිබල ගන්වන පදනමක් ලෙස නිර්මාණය කර තිබුණි. චාරිත්‍රානුකූලව ධජය එසවීම, ඔලිම්පික් ගිනිසිළුව දැල්වීම සහ බැලූන අහසට මුදාහැරීම වැනි සංකේතාත්මක ක්‍රියාකාරකම් මගින් උළෙලේ ආරම්භය සනිටුහන් විය.
ජවන සහ පිටිය ඉසව්වලින් වර්ණවත් වූ මෙම ශූරතාවලියෙන් අනතුරුව, ඉදිරි සති කිහිපය තුළ බැඩ්මින්ටන්, ක්‍රිකට්, පාපන්දු, පිහිනුම්, වොලිබෝල්, චෙස්, කැරම් සහ නෙට්බෝල් ඇතුළු තවත් ප්‍රධාන ක්‍රීඩා තරග රැසක් පැවැත්වීමට නියමිතය. මෙම ක්‍රීඩා තරගාවලිය මගින් ජවසම්පන්න, ඕනෑම අභියෝගයකට ඔරොත්තු දෙන ඉහළ කාර්යසාධනයකින් යුතු ශ්‍රම බලකායක් ගොඩනැගීම ආයතනයේ අපේක්ෂාවයි.
මෙම අභිමානවත් ක්‍රීඩා උළෙල සාර්ථකව සංවිධානය කිරීම සඳහා SLT සහ Mobitel නියෝජිතයින්ගෙන් සමන්විත 2026/27 ක්‍රීඩා කවුන්සිලය මූලික සම්බන්ධීකරණ කාර්යභාරය ඉටු කරන ලදී. “සෑම අයෙකුම එකට සම්බන්ධ කිරීම සහ සෑම ජීවිතයක්ම සුපෝෂිත කිරීම” යන ආයතනික දැක්ම යථාර්ථයක් කරමින්, ආයතනයේ විවිධ අංශ නියෝජනය කරන සියලුම සාමාජිකයින්ට එකම පවුලක් ලෙස එක්වීමට මෙම උළෙල කදිම අවස්ථාවක් විය.
