චෙම්මනි සමූහ මිනී වළෙන් සොයාගත් අස්ථි පද්ධතිවල DNA පරීක්ෂණ සිදු කිරීම සඳහා ජාත්යන්තර සහයෝගීතාව ලබාගැනීමට රජය අපේක්ෂා කරන බව අධිකරණ සහ ජාතික ඒකාබද්ධතා ඇමැති හර්ෂණ නානායක්කාර මහතා පාර්ලිමේන්තුවේදී ප්රකාශ කළේය. සත්යය වසන් කිරීමට රජයට කිසිදු අවශ්යතාවක් නොමැති බව අවධාරණය කළ ඇමැතිවරයා, නීතිමය උපදෙස්වලට අනුකූලව මෙම පරීක්ෂණ කටයුතු සිදු කරන බවත් පැවසීය.
පාර්ලිමේන්තු මන්ත්රී ශානක්යයන් රාසමානික්කම් මහතා මතු කළ ප්රශ්නයකට පිළිතුරු දෙමින් ඇමැතිවරයා දැක්වූ කරුණු:
කැණීම්වල වත්මන් තත්ත්වය සම්බන්ධයෙන් චෙම්මනි සමූහ මිනී වළෙන් මේ වන විට අස්ථි පද්ධති 412ක් හඳුනාගෙන ඇති අතර, ඉන් 409ක් සම්පූර්ණයෙන්ම ගොඩගෙන ඇත. මෙම කැණීම් කටයුතු අධිකරණ නියෝග සහ වෛද්ය පරීක්ෂණවලට අනුකූලව අතුරුදන්වූවන්ගේ ඥාතීන්ගේ සහයෝගය ඇතිව සිදු කෙරේ.
විමර්ශන ක්රියාවලිය සම්බන්ධයෙන් මෙම කටයුතු ඉතා සංවේදීව සහ පුළුල්ව සිදු කරන බවත්, ඒ පිළිබඳ වාර්තාවක් අධිකරණයට ඉදිරිපත් කර ඇති බවත් ඇමැතිවරයා සඳහන් කළේය. විමර්ශන කටයුතු තවදුරටත් සිදුවෙමින් පවතින බැවින් ඒ පිළිබඳව සම්පූර්ණ තොරතුරු වහාම හෙළි කිරීමට නොහැකි බව ඔහු පෙන්වා දුන්නේය.
රජයේ ස්ථාවරය වන්නේ ක්රිෂාන්ති කුමාරස්වාමි ඝාතනයට සම්බන්ධ කරුණු ඇතුළු අදාළ සිදුවීම් සම්බන්ධයෙන් සත්යය හෙළි කිරීමට තම රජය කැපවී සිටින බවත්, පෞද්ගලිකවම එම ස්ථානයට ගොස් තත්ත්වය නිරීක්ෂණය කළ බවත් ඇමැතිවරයා වැඩිදුරටත් පැවසීය.
