ශ්රී ලංකාවේ ප්රමුඛතම කුකුළු මස් නිෂ්පාදකයෙකු වන නිව් ඇන්තනීස් ෆාම් (New Anthoney’s Farm Group – NAF) සමාගමෙහි නිෂ්පාදන ධාරිතාව පුළුල් කිරීම සහ එහි සැපයුම් දාමය ශක්තිමත් කිරීම අරමුණු කරගනිමින් ජාත්යන්තර මූල්ය ආයතනය (IFC) විසින් ඇමරිකානු ඩොලර් මිලියන 10ක ආයෝජනයක් සිදු කිරීමට තීරණය කර ඇත.
මෙම හවුල්කාරිත්වය මගින් කුඩා පරිමාණ ගොවීන් 200ක් පමණ නියමිත සැපයුම් දාමයකට සම්බන්ධ කර ගැනීමට අපේක්ෂා කරන අතර, ඉන් 22%ක් කාන්තාවන් සහ 80%ක් අඩු ආදායම්ලාභීන් වනු ඇතැයි ගණන් බලා තිබේ. ලංකාවේ පවතින කුකුළු මස් නිෂ්පාදන ක්ෂේත්රයේ විශාලතම කොටස කුඩා ගොවීන් සතු වුවද ඔවුන්ගේ දායකත්වය සමස්ත සැපයුමෙන් 30%කට වඩා අඩු මට්ටමක පැවතීම මෙම ආයෝජනය මගින් යහපත් අතට හැරවීමට අපේක්ෂා කරයි.
මෙම ආයෝජනය මගින් නිෂ්පාදන ධාරිතාව සහ කාර්යක්ෂමතාව ඉහළ නැංවීම, පාරිසරික තිරසාරභාවය හෙවත් පරිසර හිතකාමී සහ ප්රතිජීවක රහිත නිෂ්පාදන තවදුරටත් ශක්තිමත් කිරීම මෙන්ම, 2032 වසර වන විට අපනයන හරහා අමතර ඇමරිකානු ඩොලර් මිලියන 4.95ක විදේශ විනිමය ඉපැයීමට සැලසුම් කර ඇත. එමෙන්ම සමාගම සිය සම්පූර්ණ ධාරිතාවයෙන් ක්රියාත්මක වන විට වාර්ෂිකව කුකුළු මස් මෙට්රික් ටොන් 1,936ක් අපනයනය කිරීමට අපේක්ෂා කරයි.
නිව් ඇන්තනීස් ෆාම් හි ප්රධාන විධායක නිලධාරී නීල් සූරවීර මහතා පවසන්නේ, මෙම සහයෝගීතාවය සමාගමේ පාලන තත්ත්වයන් සහ පාරිසරික තිරසාරභාවය පිළිබඳ ප්රමිතීන් ඉහළ නැංවීමට මෙන්ම, ශ්රී ලංකාවේ කෘෂි ව්යාපාර ක්ෂේත්රයට නව ආදර්ශයක් සැපයීමට හේතු වන බවයි. 2024 වසරේදී ශ්රී ලංකාවේ සමස්ත කුකුළු මස් අපනයනයෙන් 90%කට වඩා වැඩි ප්රතිශතයක් හිමි කර ගැනීමට නිව් ඇන්තනීස් ෆාම් සමත්ව තිබීම කැපී පෙනේ
